Tirana shkarkoi trajnerin e dytë të se zonit dhe emëroi trajnerin e tretë Erbim Fagu.
Një lëvizje e detyruar sipas klubit për shkak të rezultateve që po arrin ekipi dhe vendi i katërt që i rrezikohet skuadrës. Po çfarë ka ndodhur në të vërtetë te Tirana që prej largimit të trajnerit të parë nuk po gjejnë qetësi?! Si zakonisht, derbi ishte pika e mbushjes së “kupës” për të bërë ndryshime në stol. Presidenti Halilit pas asaj sfide i ishte mbushur mendja se Ahmataj nuk ia del dot të drejtojë ekipin. Kjo e bashkuar edhe me zëvendësimet në ekip gjatë ndeshjes apo edhe në sfida të tjera bënë që të bëhej ndryshimi në stol. I dyti pas largimit të Orges Shehit.
TAKIMI HALILI-AHMATAJ Pak orë para sfidës me Teutën, Halili takoi Ahmatajn dhe i kërkoi dorëheqjen. Sipas tij, rezultatet nuk i jepnin të drejtë. Për më tepër që tani skuadra rrezikon, ndërsa Ahmataj ka bërë disa eksperimente që nuk vlejnë, duke nisur me Micin që luante djathtas, apo Sulën në derbi. Këto ishin pakënaqësitë e fundit, pasi në shumë ndeshje janë analizuar probleme. Po kështu, Halili i ka lënë edhe dy ndeshje në dispozicion dhe më pas do të zgjidhte dikë tjetër. Ahmataj i ka thënë që skuadra është brenda objektivave, por nuk mund të qëndrojë në këtë situatë. Me palët që nuk kanë rënë dakord për të ardhmen, numri një i bardhebluve i ka deklaruar se e kishte humbur besimin. Në kushtet kur Ahmataj nuk u dorëhoq, Halili vendosi për shkarkimin. Veç rezultateve të pakënaqshme, një pikë e nxehtë ka qenë edhe Filip Najdovski.
MBLEDHJA ME SKUADRËN Në mbrëmje Halili së bashku me trajnerin kanë qenë në grumbullim. Halili ka parashtruar argumentet e tij në ekip për largimin e trajnerit Ahmataj, ndërsa ka njoftuar se në Durrës do të drejtojë një trajner i ri. Edhe Ahmataj ka folur para ekipit, duke i uruar grupit më të mirat dhe më pas është larguar.
KRITIKAT DHE NAJDOVSKI Gjatë takimit me skuadrën, Refik Halili nuk ka kursyer kritikat për grupin. Pika e parë ka qenë Filip Najdovski. Për këtë çështje Halili ka kërkuar që grupi ta absorbojë ishkapitenin, i cili ka një përplasje me një pjesë të lojtarëve. Mbetet për t’u parë nëse mbrojtësi do të jetë pjesë e skuadrës në vazhdim. Kritika e dytë ka qenë për disiplinën. Presidenti ka thumbuar lojtarët që vonohen dhe nuk janë seriozë në stërvitje, duke kërkuar përqendrim gjatë javës. Ai ka kërkuar nga stafi asnjë tolerim për këtë situatë të krijuar, duke deklaruar se do ta monitorojë vetë çështjen.
KTHESA Halili gjithashtu ka deklaruar para skuadrës se ka besim te grupi. Ai ka kërkuar nga të gjithë që nga sfida e radhës duhet të reagojnë. Presidenti ka kërkuar që skuadra të garantojë vendin në “Final 4” si dhe finalen e Kupës së Shqipërisë. Këto janë dy objektivat minimalë që grupi i ka detyrim për të ardhmen.
/Panorama Sport/
