Një ngjarje e rëndë raportohet të ketë ndodhur në Gjakovë, ku një vajzë 4 vjeçare ka humbur jetën. Nga raportimet e deritanishme thuhet se vajza është dhunuar nga disa të mitur, por ende nuk është konfirmuar asgjë zyrtare nga autoritetet.
Dinamika e ngjarjes:
Mamaja e vajzës 4-vjeçare, Arjana Hajra nga Gjakova, kishte shkuar në spital për të vizituar fëmijën tjetër të saj (djalë), dhe 4-vjeçaren e kishte lënë jashtë për të luajtur me fëmijë.
Më pas, atë e ka gjetur të shtrirë në tokë duke qarë. Sipas Hajrës, vajza i kishte thënë se e kishin rrahur fëmijët e familjarëve që kishin shkuar t’i vizitonin.
“E mora çikën, filloi me kajt. I thashë çka ki, më tha ma ka hi Jakupi me dërras qitu dhe djali i Sabijes mka rreh krejt. As ajo s’mkallxoj bash mirë. Tu ardh nuk mujke me ec, ‘oj mam zemra po m’dhemb’, e morra në shpi e tash si me fjalë mo e morra ajo veç kajke”, ka thënë Hajra.
Më tej ajo thotë se e mitura nuk kishte forcë për të qëndruar në këmbë dhe ka pasur mavijosje në fundshpinë e ënjtje në gjoks. Pasi e ka dërguar në Spitalin e Gjakovës, mjekët i kanë konfirmuar se vajza kishte lëndime të rënda në kokë e në gjoks. Pas përkeqësimit të gjendjes, katërvjeçarja është dërguar për trajtim në QKUK në Prishtinë. Por nëna e saj pretendon e asaj iu dha një shkak tjetër, që për fat të keq, rezultoi me vdekjen e saj.
“N’gjysë nate m’ka thirr doktorica me hy n’sallë, ku ka qenë çika. Kom hy kom nejt me çik dhe erdh doktorica po ma bën, oj zojë nuk e ka prej t’rrehnit, ka infeksion të madh. I ka shpërthy gjakderdhja prej infeksionit të madh”, ka shtuar ajo.
Shkakun e vdekjes nga një infeksion, e përmend edhe Drejtori i Klinikës Emergjente në Qendrën Klinike Universitare të Kosovës, Naser Syla, por ai nuk ka kthyer përgjigje kur është pyetur nëse 4-vjeçarja kishte shenja të dhunës në trup. Nga Drejtoria Rajonale e Policisë në Gjakovë, nuk kanë thënë më shumë për rastin sesa thuhet në raportin 24-orësh të Policisë së Kosovës derisa nuk kanë dhënë përgjigje për intervistimin e të dyshuarve për rrahjen e të miturës. Njësoj kanë vepruar edhe nga Prokuroria.
“Ju njoftojmë se është iniciuar rast i hetimit të vdekjes dhe me vendim të prokurorit trupi i pajetë i viktimës është dërguar në IML për obduksion. Në koordinim me policinë janë duke u ndërmarr të gjitha veprimet lidhur me këtë rast”, ka thënë nga Prokuroria Themelore në Gjakovë.
Nëna e të ndjerës ka thënë që vëllai i saj ka mohuar që i biri ka rrahur të miturën, teksa ai është marrë në pyetje nga Policia e Kosovës. Dritë mbi rastin që është cilësuar si “hetim i vdekjes”, pritet të hedhë raporti i Institutit të Mjekësisë Ligjore, ku ishte dërguar trupi për ekspertizë.
Sakaq për ngjarjen ka reaguar koalicioni i OJQ-ve për Mbrojtjen e Fëmijëve.
“Sipas raportimeve dhe dyshimeve të ngritura nga prindërit e vajzës të cilat janë transmetuar në media, e ndjera dyshohet se ka pësuar një sulm nga dy fëmijë të tjerë, duke u goditur me forcë në pjesën e shpinës dhe gjoksit, gjë që ka çuar edhe në rrëzimin e saj në rrugë.
Me gjithë gjendjen e rënduar të fëmijës, prindërit janë shprehur se përgjigja mjekësore ndaj gjendjes së saj ka qenë e pamjaftueshme. Ata pretendojnë se gjatë ditës së djeshme kanë kërkuar disa herë ndihmë mjekësore për vajzën e tyre, por kanë marrë vetëm disa këshilla sipërfaqësore nga ekipi mjekësor, duke nënvlerësuar tragjikisht ashpërsinë e gjendjes së saj”, thuhet në komunikatën për media.
Sipas prindërve, vajza nuk ka marrë një ekzaminim të plotë mjekësor dhe trajtimi i duhur i saj është neglizhuar duke shkaktuar fatalitet, gjë që sipas KOMF-it ngre shqetësim dhe pikëpyetje të thella në lidhje me etikën profesionale të personelit mjekësor.
