Kreu i Bashkisë së Tiranës, Erion Veliaj, duket se ka shfrytëzuar një intervistë televizive për t’i dhënë disa mesazhe të koduara shefit të tij, kryeministrit Edi Rama.
Veliaj i ka kërkuar Ramës që të mos mbyllë partinë, por të mësojë nga “gabimet” e kundërshtarëve, sipas tij, duke iu referuar partive në opozitë.
Kreu i Bashkisë së Tiranës tha se Rama nuk duhet ta izolojë partinë dhe të thotë se është vetëm ai atje dhe s’ka të tjerë.
“Partitë që mbyllen, janë partitë që tkurren. Po të shikoni si është tkurrur LSI-ja, që iu desh të ndërronte emrin që të mos identifikohej me një katastrofë politike. Po të shikosh se si PD-ja prap është tkurrur nga një parti që kontrollonte gjithë vendin, në një parti që kontrollonte vetëm Tiranën në 2015-tën, pastaj vetëm bulevardin, pastaj vetëm oborrin. Unë besoj se është fatkeqësi në qoftë se nuk mëson dhe nga gabimet e kundërshtarëve. Ndoshta nuk mëson nga gjërat e mira të kundërshtarëve kur nuk bëjnë asgjë të mirë, por mund të mësosh nga gabimet. Të mësosh nga gabimet do të thotë të mos bësh gjëra të ngjashme, të mos e izolosh partinë. Mos të thuash ne jemi këtu dhe s’ka të tjerë, se patjetër që ka të tjerë.” – thotë Veliaj.
Siç duket, Veliaj po i trembet SPAK, ku është nën hetim për aferën e inceneratorit të Tiranës, për të cilën është vënë në pranga dhe një nga njerëzit më besnik të tij, Taulant Tusha.
Po ashtu, Veliaj u konsiderua si “pronar faktik” dhe nga ish-numri 2 i Qeverisë, Arben Ahmetaj, i cili në një intervistë televizive hodhi akuza të rënda ndaj tij.
Gjithashtu, rreth 2-3 javë më parë, zyrat dhe banesat e drejtorëve të bashkisë së Tiranës janë bastisur nga agjentet e Byrosë Kombëtarë të Hetimit. Kontrollet janë urdhëruar nga SPAK që po heton zyrtarët e lartë të bashkisë për procedimet penale të inceneratorit të Tiranës dhe atë të njohur si “5D” – lidhur me një skemë e dyshuar korruptive me tendera nga strukturat e Bashkisë së Tiranës.
