Eshtë vetëdorëzuar në polici mëngjesin e kësaj të hëne, 31-vjeçari Amarildo Kamberi, i cili dy ditë më parë plagosi me armë zjarri fqinjin e tij Xhevahir Kolaveri.
Ngjarja ndodhi pasditen e të shtunës në Tiranë, te rruga ”Haki Shehu”, ku pas një sherri të çastit, 31-vjeçari plagosi me armë në këmbë 47 vjeçarin dhe u largua nga vendngjarja.
Blutë bëjnë me dije se autori është vetëdorëzuar. Sakaq i plagosuri ndodhet jashtë rrezikut për jetën.
Njoftimi i policisë:
Vetëdorëzohet në Polici, 31-vjeçari që plagosi me armë zjarri fqinjin e tij, më datë 17.02.2024.
Sekuestrohet arma e zjarrit pistoletë e dyshuar e përdorur për plagosjen dhe sasi municioni luftarak.
Specialistët e Seksionit për Hetimin e Krimeve Ndaj Personit në DVP Tiranë ndaluan shtetasin A. K.(K)., 31 vjeç, banues në Tiranë.
Ky shtetas, më datë 17.02.2024, rreth orës 17:35, në rrugën “Haki Shehu”, Tiranë, është konfliktuar për motive të dobëta, me fqinjin e tij, shtetasin Xh. K., dhe gjatë konfliktit e ka qëlluar atë me armë zjarri.
Si pasojë shtetasi Xh. K. është dëmtuar. Aktualisht ndodhet jashtë rrezikut për jetën.
Në cilësinë e provës materiale u sekuestrua arma e zjarrit pistoletë, e dyshuar e përdorur gjatë ngjarjes, dhe sasi municioni luftarak.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjjthshëm Tiranë, për veprime të mëtejshme.
