Një plagosje me thikë ka ndodhur mëngjesin e kësaj të shtune në Kavajë. Një 55 vjeçar është goditur me thikë në këmbë pas një konflikti me një tjetër shtetas.
I plagosuri është transportuar drejt spitalit të Durrësit, për ndihmë mjekësore, sakaq policia po punon për identifikim dhe kapjen e autorit.
“Rreth orës 10:30, në lagjen nr. 5 Kavajë, dyshohet se shtetasi, 55 vjeç, gjatë një konflikti për motive të dobëta, me një shtetas të panjohur, ka mbetur i dëmtuar me thikë dhe ndodhet nën kujdesin e mjekëve, jashtë rrezikut për jetën.
Menjëherë, shërbimet e Policisë kanë mbërritur në vendngjarje dhe po bëjnë krehjen e zonës për identifikimin dhe kapjen e autorit”,- njofton policia.
Grupi hetimor vijon punën për dokumentimin e rrethanave të kësaj ngjarjeje.
