Premier League ka miratuar ofertën prej 1.3 miliard paundë të Jim Ratcliffe për të blerë 25% të aksioneve të Manchester United.
Kjo u raportua nga “Telegraph” që njoftoi se kompania “INEOS Sport” në pronësi të Ratcliffe, siç përcaktohet nga marrëveshja, do të marrë kontrollin e operacioneve të futbollit të ‘Djajve të Kuq’, të cilët fituan ndeshjen e tyre të fundit jashtë fushe në Aston Villa 2-1.
Manchester United është në shitje që prej sezonit të shkuar dhe në verën e fundit u intensifikua çështja me sheikun e Qatarit, Al-Thani që bëri një ofertë të majme prej 5 miliard paund për 100% të klubit, por u refuzua nga pronarët aktual të familjes Glazer të cilët nuk janë të gatshëm të heqin përfundimisht dorë.
Sheiku në gusht u tërhoq nga gara pasi refuzoi të ngrinte ofertën në 6 miliard dhe në ankand ka mbetur vetëm miliarderi britanik Jim Ratcliffe.
Megjithatë ky i fundit nuk e ka fuqinë për të bërë një ofertë të tillë për 100% të aksioneve të klubit dhe pritet të marrë fillimisht vetëm një pakicë.
