Objektivi i sulmit me armë të ndodhur mëngjesin e kësaj të shtune në fshatin Gurëz të Kurbinit ishte Ardjan Gjeloshi, 51-vjeç, pronari i firmës së inerteve ku ndodhi krimi. Këtë e konfirmoi Zëvendësdrejtori drejtori i Policisë së Lezhës, Gentian Berberi, në një prononcim të shkurtër për gazetarët nga vendngjarja.
Sipas një rindërtimi paraprak të ngjarjes, Ardjan Gjeloshi ishte bashkë me ekonomistin e firmës së tij Selman Mihana brenda zyrave të kompanisë, kur ndaj tyre është qëlluar me armë zjarri.
Autorët pjesëmarrës në krim dyshohen të kenë qenë më shumë se dy, ndërsa mbetet ende e paqartë se sa prej tyre kanë qenë në rolin e qitësit.
Qitja është kryer nga hyrja e biznesit, me objektivin që ka qenë në një largësi rreth 200 metra. Si pasojë e breshërisë së të shtënave, mbeti i plagosur Ardjan Gjeloshi, ndërsa humbi jetën Selman Mihana. Burime spitalore konfirmojë se i plagosuri ndodhet jashtë rrezikut për jetën.
Autorët ndërkohë dyshohet se janë larguar me një automjet pas atentatit.
Numri dy i policisë së Lezhës, i pyetur për shkakun e dyshuar të krimit, tha se po hetohen të gjitha konfliktet dhe mosmarrëveshjet që mund të ketë pasur pronari i firmës së inerteve.
Firma është e pajisur me kamera sigurie dhe këqyrja e tyre nga hetuesit pritet të hedhin më shumë dritë rreth vrasjes. Hetuesit gjithashtu kanë nisur marrjen në pyetje të personave që mendohet të kenë dijeni rreth rastit. Një prej tyre është roja i objektit, që mendohet të ketë parë dinamikën e krimit.
