Kreu i partisë vulës, Lulzim Basha tha këtë të shtunë se intervista e Arben Ahmetajt disa ditë më parë, u dha me qëllim që ish-numri dy i qeverisë të përfitonte azil politik.
“Para disa ditësh, dyshi i njishit doli në një intervistë të përgatitur për të marrë azil politik. Nuk është se bëri gjëmën si paralajmëroi, nuk është se tha gjëra që si dinë shqiptarët. Por diçka ndodh që s’ka ndodhur në 34 vite. Ish-zëvendëskryeministri tha që kryeministri është pronari i vërtetë i inceneratorëve. Është përfituesi financiar dhe elektoral i inceneratorëve…”, tha Basha gjatë një aktiviteti politik në Vlorë.
Hipotezës se Ahmetaj akuzoi publikisht kryeministrin Edi Rama dhe kryebashkiakun e Tiranës Erion Veliaj për aferën e inceneratorëve me qëllimin përfitimin e azilit politik, i është mëshuar nga mediat pranë pushtetit. Ndërkohë, drejtuesi i emisionit ku u tramentua intervista e Ahmetaj, Çim Peka ka deklaruar se Ahmetaj e kishte përfituar azilin në Zvicër më herët.
Gjatë fjalës së tij, Basha ironizoi dhe protestat e PD-së së drejtuar nga Sali Berishës. Sipas tij, ato kanë pjesëmarrje të ulët.
