Këshilli i Lartë Gjyqësor ka vendosur pezullimin nga detyra të gjyqtares së Gjykatës së Tiranës, Arnisa Këlliçi. Ky vendim vjen pasi ajo është marrë e pandehur nga Prokuroria e Tiranës nën akuzën për kallëzim të rremë, pas pretendimeve të saj se ishte kërcënuar me jetë ajo edhe familja e saj.
Në një kallëzim të depozituar më 20 Janar, gjyqtarja e Gjykatës së Tiranës pretendoi se kishte marrë një letër kërcënuese që ia kishin vendosur në zyrën e saj, por sipas organit hetues ka rezultuar se letra kërcënuese është shkruar nga vetë Arnisa Këlliçi.
Teksti në letër ishte shkruar me shkrim të keq dhe i drejtohej gjyqtares me fjalët: “E dashur gjyqtare A….., keni dy fëmijë, D…… dhe R…….. Mendoni për ta se mund të rroni ju e jo ata dhe kjo është e rëndë. Me respekt!”.
Kujtojmë se më 22 Janar, Këshilli i Lartë Gjyqësor u mblodh me urgjencë, duke pranuar kërkesën për mbrojtje të gjyqtares së Tiranës për një afat, më së paku tre-mujor. Pas këtij vendimi, në dispozicion të gjyqtares u vendosën 6 punonjës policie, të cilët do mbronin me dy turne zonjën Këlliçi dhe familjen e saj.
Zbardhet skandali/Gjyqtarja Këlliçi e shkroi letrën kërcënuese, merret e pandehur
