Një 35-vjeçar nga Vlora është arrestuar nga policia greke, pasi ishte shpallur në kërkim ndërkombëtar nga autoritetet shqiptare.
Në pranga është vënë shtetasi Joni Idrizi, i cili është kapur në rrugën “Liosion 300” në Athinë teksa pinte kafe pranë një pike automjetesh.
Idrizi rezulton i shpallur në kërkim ndërkombëtar nga policia shqiptare, i dënuar me vendim të formës së prerë nga Gjykata. Policia greke bën me dije se kërkimi nga policia shqiptare është për shkak të thyerjes së një mase sigurie të vendosur nga drejtësia.
Gjithashtu, raportohet se vëllai i tij, Nardi alias Fatbardh Idrizi, 38 vjeç nga Vlora, kërkohet prej muajit dhjetor 2023 për plagosjen e 3 të rinjve nga Kreta.
Dy vëllezërve Idrizi, u është vrarë shumë vite më parë vëllai i tyre Leonard Idrizi, i cili ishte pjesë e bandës së “Çoles”.
Ngjarja
Joni Idrizi rezulton i dënuar më parë në vitin 2012 si pjesë e një grupi kriminal në Vlorë që kryente grabitje me armë në banka, kazino e karburante. Ai ishte pjesë e bandës prej 6 grabitësish, teksa Policia ngriti dyshime se ata ishin pasardhës të bandës famëkeqe të Çoles që ka vepruar në qytetin bregdetar para viteve 2000.
Në atë kohë, Policia në kuadër të operacionin “SFIDA 2”, arrestoi katër shtetas dhe shpalli në kërkim 3 të tjerë, duke i akuzuar si anëtarë të një grupi kriminal, që kanë grabitur disa njësi tregtare, kazino, disa pika karburanti, si dhe disa shtetasve u kanë marrë gjithçka që kanë pasur me vete. Të gjitha krimet i kanë kryer nën kërcënimin e armëve të zjarrit.
Në atë kohë u arrestuan: Nardi Ismet Idrizi, Joni Ismet Idrizi, Mario Maliq Metaj dhe Armando Izet Likaj, të gjithë banues në Vlorë, si dhe u shpallën në kërkim 3 shtetas të tjerë bashkëpunëtorë të tyre E.H., M.V. dhe A.D., banues në Vlorë.
Sipas policisë, arrestimi i këtyre shtetasve u krye pasi nga hetimet disamujore ka rezultuar se në bashkëpunim me njëri-tjetrin, në 9 raste, nën kërcënimin e armëve dhe të maskuar, kanë vjedhur disa pika karburantesh dhe në një rast një kazino në qytetin e Vlorës. Këta shtetas janë edhe autorë të tentativës së grabitjes me armë zjarri automatike në një pikë karburanti që ndodhej në rrugën Transballkanike. Në këtë rast, shtetasit e mësipërm kanë qëlluar me armë zjarri në drejtim të automjetit të patrullës së policisë duke e dëmtuar atë në disa vende dhe kanë rrezikuar seriozisht jetën e punonjësve të policisë gjatë tentativës për arrestimin e tyre në flagrancë nga policia.
Mbas kryerjes së krimit, një nga autorët, nën kërcënimin e armës, i ka vjedhur edhe mjetin dhe sendet shtetasit V.Gj., duke e përdorur atë për t’u larguar nga vendi i ngjarjes. Gjithashtu, në lidhje me operacionin policor, janë arrestuar në flagrancë edhe shtetasit Elton Veliko dhe Rexhino Aliu, pasi kishin strehuar me qëllim shpëtimin nga ndjekja e policisë njërin prej autorëve të vjedhjeve me armë dhe konkretisht shtetasin Nardi Idrizi.
Lidhja e kësaj bande me Bbandën e Çoles, sipas Policisë së Vlorës, ishte se një nga të dyshuarit para disa vitesh ka pasur kontakte telefonike me personat që janë në burg përjetë. Mësohet se të arrestuarit kishin marrë urdhra nga shefat e tyre në burg përgjatë viteve 2002-2005. Pas kësaj periudhe rezulton se ata kishin dalë të “pavarur” nga shefat që ndodhen ende në qeli.
Nuk dihet se si dy vëllezërit Nardi dhe Joni Idrizi kanë arritur t’i shpëtojnë burgut.
