Banorë të fshatrave të Krujës që preken nga projekti i rrugë Thumanë-Kashar kanë protestuar sot duke kërkuar të bëhet publik projekti i rrugës e madje të ngrihet komision hetimor për projektin jotransparent.
Ata janë shprehur qartë se këtë protestë po e bëjnë për familjet e tyre, pasi kanë bizneset në këtë aks dhe projekti jotransparent nuk u jep asnjë mundësi se si do të shkojnë në bizneset që kanë aty pranë.
“Në Evropë shkohet me rrugë të hapura, jo me rrugë të mbyllura” thuhet në njërën nga parullat që ata ngritur.
“Nga kjo mbyllje rruge neve na shtohen 10 km. Nga kjo mbyllje ne duhet të shkojmë rreth e qark nëpër rrugën e vjetër që ka bërë Enver Hoxha”, tha nje protestues
“Nuk mund të bllokohet kjo rrugë se kjo quhet autostrada Thumanë – Kashar dhe të të mos lihet dalje për këto biznese që kanë investuar djersën e tyre për 30 vjet. Arroganca e qeverisë dhe e këtyre oligarkëve ka arritur në kufij. Nuk mund të lihet ky popull pa i dhënë një shpjegim se si do të procedohet në këtë rrugë. Kështu që i bëj thirrje të gjithë banorëve, fermerëve dhe bizneseve se ne do të jemi mbështetje. Protestat të përshkallëzohen jo vetëm këtu tek rrethrrotullimi i Thumanës, por në të gjithë fshatrat e kësaj zone deri në Rinas”, tha nje tjeter.
Ndërsa kryetari i degës së PD në Krujë, tha: “Siç e shikoni, ky segment rrugor Thumanë-Kashar ka bllokuar me qindra banorë për vetëm një hyrje dalje që kërkojnë banorët. Një hyrje-dalje që është shumë e drejtë për banorët. Të izolohen banorët e Thumanës, të Fushë Krujës, të Krujës, të Niklës, Bubqit, të gjithë zonat, kjo është e padrejtë. I bëjmë thirrje kryeministrit Edi Rama të marrë masa dhe të hapë rrugën e banorëve, se nuk po i kërkojnë punësim. Ky jo vetëm që s’afron punësim, por po ua mbyll të gjitha bizneset, po e izolon të gjithë zonën. Protestuesit janë qendrestarë dhe do të jenë deri në zgjidhjen e problemit. Ne si PD do të jemi në mbështetje sa herë të na kërkojnë banorët e kësaj zone.”
