Valbona Treska u shkarkua pak ditë më parë me votat e 204 psikologëve që janë pjesë e anëtarësisë së Urdhrit të Psikologëve, nga 368 anëtarë që morën pjesë, në mbledhjen që zgjati rreth 7 orë.
Në studion e “Opinion” dolën të dhëna që nxjerrin në pah shkeljet që sipas anëtarësisë dhe psikologëve që kërkuan shkarkimin, ka bërë presidentja Treska.
Por, kjo e fundit nuk pranon faktin se është shkarkuar.
Psikologët e akuzojnë Treskën se për një trajnim merret 150 mijë lekë të reja nga një psikolog nga urdhri.
Treska vijon të mbrohet për të justifikuar paratë e përfituara nga trajnimi dhe rritjen e tarifave të kuatizacionit, nga 6 mijë lekë në vit në 8 mijë lekë në vit.
Psikologët kanë paguar nga 140 mijë lekë të reja, por edhe 150 mijë lekë të reja.
Psikologët e gjykatave paguajnë më shumë. Trajnimi nuk është detyrues për psikologët, por Treska sipas anëtarëve të urdhrit, i ka detyruar të futen në trajnim dhe të paguajnë tarifën e majme.
Nga ana tjetër, Treska tha se trajnimin e përcakton ligji. “Bëjmë trajnimin që disa psikologë të punojnë si ekspertë pranë sistemit të drejtësisë, sepse e përcakton ligji. Ky trajnim me 16 veta, janë 120 orë trajnim, 13 lektorë, 12 fundjava”, tha Treska.
U fol edhe për psikologët e shkollave që sot janë 477 dhe Treska tha se lobin për të emëruar ata nëpër shkolla.
Një debat i fortë ka nisur së fundmi brenda urdhrit të psikologut. Një e treta e urdhrit, pra rreth 521 anëtarë nga 1600 që janë gjithsej, firmosën për mbledhjen e asamblesë dhe shkarkimin e presidentes, Valbona Treska, e cila qëndron në krye të urdhrit që prej vitit 2017. Ajo akuzohet se ka uzurpuar urdhrin, ka bërë emërime në punë jashtë çdo kriteri dhe teksa paguhet me paratë e anëtarësisë, ka zhvilluar trajnime që nuk janë të parashikuara në ligj (për një trajnim merr 150 mije lekë të reja).
