Juventusi nuk ka shkuar më shumë se barazimi 1-1 në shtëpi përballë Empolit, duke u ndalur kështu pas 5 fitoresh radhazi në kampionat.
Sfida nuk nisi mirë për bardhezinjtë, pasi mbetën me 10 lojtarë pas daljes me karton të kuq të Milik në minutën e 18-të.
Gjithsesi goli për “Zonjën” erdhi nga Dushan Vlahoviç në minutën e 50-të, duke bërë që bardhezinjtë të mendonin për fitoren e radhës.
Por pas vetëm 20 minutash, ishte Baldanzi ai që i prishi festën ekipit të Alegrit, duke rikthyer baraspeshën.
Më pas takimi nuk pati më histori, me të dyja skuadrat që u ndanë me nga një pikë.
Në fushë për Empolin për 90 minuta ishte Ardian Ismajli, ndërsa në stol ishin Stiven Shpendi dhe Etrit Berisha, ky i fundit i rikthyer pas një dëmtimi.
Kështu Juventusi vazhdon në vendin e parë me 53 pikë, dy më shumë se Interi i vendit të dytë, por me zikaltrit që janë dy ndeshje më pak.
Nga ana tjetër, Empoli tashmë shpreson te mbijetesa pas pikës së vyer kundër bardhezinjve në “Allianz Stadium”.
