Një ngjarje e rëndë ka ndodhur pasditen e sotme në Durrës.
Bëhet me dije nga burimet për media se një oficer policie është vetëvrarë.
Sipas informacioneve mësohet se nënkomisar Arben Pjeçi vrau veten në zyrën e tij brenda Policisë së Durrësit, teksa në informacionet paraprake viktima ka një karrierë 35-vjeçare në uniformat blu.
Mësohet se Arben Pejçi është vetëvrarë me armën e shërbimit. Ai ndodhej në gjendje të rëndë psikologjike pasi ishte pezulluar nga detyra.
Ende nuk dihen shkaqet që e kanë shtyrë Arben Pejçin të kryejë vetëvrasje.
- Policia e Durrësit jep detaje: U dënua për plagosje, prandaj u shkarkua
Policia e Durrësit ka dalë me njoftim zyrtar për vetëvrasjen e nënkomisarit Arben Pjeçi në zyrën e tij.
Në njoftim theksohet se ai kishte mbyllur derën dhe ishte familja e cila denoncoi rastin në polici, pasi nuk po komunikonin dot me atë.
Policia më pas ka hapur derën e zyrës me forcë dhe e ka gjetur të vetëvrarë me armën e shërbimit. Po ashtu theksohet se Pjeçi ishte dënuar me vendim të prerë për plagpsje të lehtë dhe për këtë është shkarkuar nga detyra që mbante.
“Durrës/Informacion paraprak Sot, më datë 25.01.2024, nga ana e familjarëve të oficerit të Policisë Arben Pjeçi, është njoftuar Komisariati i Policisë Durrës, për humbjen e kontakteve me familjarin e tyre, i cili aktualisht është në detyrë specialist i Policisë Kriminale në këtë komisariat. Nga Komisariati i Policisë Durrës filluan veprimet për kërkimin dhe gjetjen e specialistit. Për njoftimin e bërë nga familjarët është marrë kallëzim, është njoftuar prokurori i gatshëm, janë kryer një sërë veprimesh procedurale, si dhe janë vënë në kontroll numrat telefonikë, me qëllim lokalizimin e vendndodhjes së këtij shtetasi.
Në kuadër të të gjitha veprimeve operacionale dhe procedurale për kërkimin e tij, rreth orës 16:15, në ambientet e Komisariatit të Policisë Durrës është hapur me forcë zyra e oficerit Policisë Gjyqësore, Arben Pjeçi, i cili është gjetur i vetëvrarë, me armën e shërbimit. Punonjësi i Policisë Arben Pjeçi është dënuar me vendim të formës së prerë nga Gjykata e Shkallës së Parë e Juridiksionit të Përgjithshëm Durrës, për kundravajtjen penale “Plagosje e lehtë”, në bazë të nenit 89 të Kodit Penal.
Vendimi i Gjykatës i formës së prerë ka filluar të ekzekutohet nga strukturat përgjegjëse të Shërbimit të Provës dhe Policisë së Shtetit. Punonjësi i Policisë, në kushtet e depresionit për penalitetet që sjell vendimi i dënimit të formës së prerë që e kushtëzonte në të ardhmen me ndërprerjen e marrëdhënies së punës me Policinë e Shtetit, është vetëvrarë me armën e shërbimit në ambientet e zyrës së punës, në Komisariatin e Policisë Durrës. Për këtë ngjarje është krijuar një grup i posaçëm hetimor, në drejtimin e Prokurorisë së Durrësit dhe oficerëve të Policisë Gjyqësore të Prokurorisë. Për këtë ngjarje është njoftuar dhe Agjencia e Mbikëqyrjes Policore. Në lidhje me rrethanat dhe për sqarimin përfundimtar të motivit, do të kemi njoftim shterrues në përfundim të veprimeve hetimore paraprake”, thuhet në njoftimin e policisë.
