Personi që shihni në fotot e mëposhtme është efektivi i Policisë së Durrësit, Arben Pjeçi, i cili u gjet i vrarë me armë zjarri brenda zyrës së tij në ambientet e Policisë së Durrësit.
Ai kishte kyçur derën nga brenda dhe dyshohet se ka vrarë veten në kushte të rënduara psikologjike. Familjarët kishin humbur kontaktet me të dhe kishin njoftuar Komisariatin e Policisë së Durrësit.
Blutë e qytetit bregdetar njoftuar se rreth orës 16:15, në ambientet e Komisariatit të Policisë Durrës është hapur me forcë zyra e oficerit të Policisë Gjyqësore, Arben Pjeçi, i cili është gjetur i vetëvrarë, me armën e shërbimit.
Sipas autoriteteve, dyshohet se Pjeçi e ka ndërmarrë këtë akt ekstrem në kushte të rënduara psikologjike, pasi prej disa ditësh ishte pezulluar nga detyra për shkak se ishte dënuar me vendim të formës së prerë nga Gjykata e Shkallës së Parë e Juridiksionit të Përgjithshëm Durrës, për kundravajtjen penale “Plagosje e lehtë”.
“Punonjësi i Policisë, në kushtet e depresionit për penalitetet që sjell vendimi i dënimit të formës së prerë që e kushtëzonte në të ardhmen me ndërprerjen e marrëdhënies së punës me Policinë e Shtetit, është vetëvrarë me armën e shërbimit në ambientet e zyrës së punës, në Komisariatin e Policisë Durrës.” – thuhej në njoftim.
Për këtë ngjarje është krijuar një grup i posaçëm hetimor, në drejtimin e Prokurorisë së Durrësit dhe oficerëve të Policisë Gjyqësore të Prokurorisë. Gjithashtu, është njoftuar edhe Agjencia e Mbikëqyrjes Policore.
Arben Pjeçi ishte në detyrën specialist i Policisë Kriminale në komisariatin e Policisë së Durrësit. Ai kishte një karrierë rreth 35-vjeçare në radhët e uniformave blu.
