Një 25-vjeçar është arrestuar në Malësinë e Madhe, pasi akuzohet për grabitje. Në pranga ka rënë shtetasi Ejllo Mitaj, pasi në datë 5 dhjetor të vitit të kaluar ka grabitur disa pajisje kompjuterike në shkollën e mesme të zonës.
Ai ishte lënë në ‘arrest shtëpie” për një tjetër vjedhje të kryer më herët në një banesë në Grudë, ku ka hequr instalimet elektrike.
“Në vijim të veprimeve procedurale u kap dhe u vu në pranga shtetasi E. M., 25 vjeç, banues në fshatin Grudë, Malësi e Madhe. Nga verifikimet rezultoi se 25-vjeçari kishte thyer masën e sigurisë “Arrest në shtëpi”, të caktuar nga Gjykata, për veprën penale “Ndihma për kalim të paligjshëm të kufijve”, për të kryer vjedhjen e 8 pajisjeve kompjuterike në këtë gjimnaz, si dhe për të vjedhur më datë 23.01.2024, instalime elektrike dhe pajisje në banesën e shtetasit I. A., në fshatin Grudë.
Gjithashtu, u referuan materialet procedurale shtesë për shtetasin P. K., 23 vjeç, banues në fshatin Gruemirë, pasi dyshohet se ka bashkëpunuar me shtetasin E. M., për të kryer vjedhjen në gjimnazin e këtij fshati. Aktualisht, shtetasi P. K. është në IEVP Lezhë, me masë sigurie “Arrest në burg”, për veprën penale “Prodhimi dhe shitja e narkotikëve”,- njofton Policia.
Materialet procedurale i kaluan prokurorive kompetente, për veprime të mëtejshme.
