Ditën e sotme u mbajt seanca në GJKKO për ish-ministrin e Mbrojtjes, Fatmir Mediu, lidhur me çështjen “Gërdeci”.
Nga SPAK për të dëshmuar, ishin thirrur shtetasit Shkëlzen Madani, Rezart Tershana, Zenun Fero, Dashnor Çaushi dhe Besnik Dauti. Shkelzën Madani, ish-Drejtor i Shërbimeve Mbështetëse në Ministrinë e Mbrojtjes ka deklaruar se Mediu nuk ka pasur asnjë ndikim apo influencë në punën për demontimin e armëve.
“Gërdeci u përcaktua nga privati, asnjëherë nuk pati influencë nga Ministri i Mbrojtjes”, ka thënë Medani.
Po ashtu ai ka thënë se ka marrë një shkresë me mbishkrim për Shkëlzen Berishën, djalin e ish-kryeministrit, por shtoi se ia ka kaluar atë Drejtorisë Juridike, pasi nuk ka qenë për të.
“Më erdhi shkresa me mbishkrimin për Shkëlzen Berishën dhe ia kalova Drejtorisë Jurdike se nuk ishte për mua”, tha Medani.
Ndërsa ish-ushtaraku Zenun Fero ka deklaruar se ka bërë 3 vite burg dhe nuk e di përse i ka bërë.
Seanca e radhës u vendos të mbahet më 7 shkurt ora 9:00, për shkak se Mediu ka kërkuar disa ditë kohë, pasi do të jetë pjesë e delegacionit të Kuvendit dhe do bashkëdrejtojë konferencën për interferencat malinje ruso- kineze në Ballkan.
Pas seancës, në një deklaratë për gazetarët duke iu referuar dëshmive në gjykatë, Fatmir Mediu tha se ai nuk ka bërë asgjë tjetër përveç zbatimit të ligjit.
“Dëshmitarët kanë qenë dy grupe, dëshmitarë që kanë pjesë e komisionit të çmimeve të municioneve dhe dëshmitarë që kanë qenë pjesë e kategorizimit të municioneve, se dhe ata që kanë përgatitur VKM dhe urdhrat. Doli qartë që nuk ka pasur asnjë indicie apo ngacmim nga ministri i Mbrojtjes, që të shtynte as VKM as urdhra apo të ndikonte në vendimmarrjen e tyre. Doli e qartë një gjë e rëndësishme, ndarja e civilëve nga ushtarakët. Doli qartë edhe që qarkullimi i mallrave brenda Ministrisë së Mbrojtjes, bëhet pa pagesë, proces që tregon se ministri nuk ka bërë asgjë tjetër, përvec zbatimit të ligjit. Shpresoj që në seancën e radhës të gjithë të vijnë dhe të dëshmojnë”, tha Mediu.
Mediu po gjykohet në GJKKO për çështjen “Gërdeci” për dy akuza atë të “Shpërdorimit të Detyrës” dhe “Shpërdorim i detyrës në bashkëpunim me subjekt ushtarak-kuadër komandues”.
