Mjeku Ilir Alimehmeti ka komentuar raportin e OBSH i cili thotë se qytetarët shqiptarë paguajnë 60% nga xhepi për shëndetësinë.
Ai u shpreh se në Shqipëri është fenomen të paguash shifra të larta për shëndetësinë. Alimehmeti shpjegoi se Shqipëria është vendi ku investohet 2.8% e Prodhimit të Brendshëm Bruto, shifër që ai theksoi se është më e ulëta në Europë.
Sipas tij nëse minimumi prej 7% e PBB nuk arrihet në investimin në Shëndetësi nuk mund të ketë ulje të shifrave të OBSH.
“Kam besim të plotë te OBSH, nuk është ndërtuar kot aty nga OKB. Një gjë të ngjashme kanë raportuar edhe më herët. OBSH është OBSH. Le të pyesim qytetarët vetë, ata e dinë shumë më mirë xhepin e tyre. Në Shqipëri është fenomen të paguash shifra të larta për shëndetësinë. Ka disa fusha ku ka përparim, patjetër. Shëndetësia nuk gjeneron para, për të paguhen para. Ne kemi 2.8% të PBB që e çojmë për shëndetësinë, niveli më i ulët në Europë, nga krahu tjetër shpenzimet më të larta në Europë për të. Nëse nuk shkojmë minimumi te 7% e PBB-së që të investohet dhe të mos ketë abuzime me to, asnjëherë nuk do të ulen shifrat që ka nxjerrë OBSH”, tha ai.
