Inxhinieri dhe dy punëtorë të pallatit në Tiranë ku ndodhi incidenti me dy të plagosur një ditë më parë, janë arrestuar. Mëngjesin e së Hënës, në bulevardin “Gjergj Fishta”, u rrëzuan skelat e një pallati në ndërtim e sipër nga firma “Arlis-ndertim” dhe për pasojë mbetën të lënduar 2 kalimtarë.
Në pranga kanë rënë, Zef Kalaj, 49 vjeç, Elton Osmanllari, 41 vjeç dhe Erjon Kanto, 41 vjeç. Të arrestuarit akuzohen se nuk respektuan rregullat e sigurimit teknik.
Ngjarja ka ndodhur rreth orës 10:00, kur Hysen Lavdari 72 vjeç dhe Imelda Shkëmbi 38 vjeçe, kalimtarë të rastit, po ecnin në trotuarin buzë kantierit kur papritur, skela u shkëput nga pallati në ndërtim dhe u ra në kokë. Të dy u transportuan në spital për të marrë ndihmë mjekësore.
“Ditën e djeshme, në orën 10:00, në bulevardin ‘Gjergj Fishta’, dyshohet se për shkak të mosrespektimit të rregullave të sigurimit teknik në punë, nga kati i 13-të i pallatit në ndërtim, ka rënë një skelë metalike që dëmtoi 2 kalimtarë të rastit, shtetasit I.Sh., 38 vjeçe dhe H. L., 72 vjeç, të cilët ndodhen jashtë rrezikut për jetën”, njoftoi policia.
Firma që po kryen punimet është “Arlis-ndertim” sh.p.k. në pronësi të biznesmenit Armand Lilo, ndaj të cilit nuk ka procedim nga policia për këtë rast.
Lilo njihet si person me lidhje politike, kryesisht me ish-ministrin e Brendshëm Fatmir Xhafaj.
Ai ka përfituar leje ndërtimi në disa zona të kryeqytetit, ndërsa është akuzuar në disa raste për ndërtime pa leje dhe përfitime të jashtëligjshme nga pushteti.
