Prej rreth tre muajsh tashmë, opozita (përveç grupimit të Bashës) ka ndërmarrë një aksion për të bllokuar të gjitha punimet parlamentare, qofshin seanca plenare apo në Komisione, deri në plotësimin e kërkesave të tyre për ngritjen e komisioneve hetimore, apo ndryshimin e anëtarëve të opozitës në komisionin e reformës zgjedhore.
Mazhoranca ka vendosur që punimet në Komisione t’i mbajë online, por ato janë bojkotuar nga deputetët e opozitës. Por, ditën e sotme duket se disa deputetë të opozitës kanë dalë nga rreshti dhe kanë ‘thyer’ bojkotin, duke marrë pjesë në mbledhjet e Komisioneve Parlamentare të cilët po zhvillohen ne Zoom.
Këtë të martë në Komisionin e Sigurisë është diskutuar nisma ligjore për dhënien e Amnistisë për të burgosurit. Ajo që ka rënë në sy gjatë kësaj mbledhje është fakt se ka marrë pjesë, deputeti i PD-së së Durrësit, Ferdinand Xhaferri, po ashtu dhe ish-kryetarja e LSI-së, Monika Kryemadhi, aktualisht deputete e Partisë së Lirisë.
Nga ana tjetër, në Komisionin e Ekonomisë dhe Financave, opozitari që ka ‘thyer’ bojkotin ka qenë kreu i LZHK-së, Dashamir Shehi.
