Një 36-vjeçare ka ndërruar jetë mbrëmjen e sotme në spital, pasi rreth 10 ditë më parë, u përplas nga një automjet, teksa po kalonte në vendkalimin e këmbësorëve në Tiranë. Viktima është shtetasja Merita Ferracaku nga Tirana.
Aksidenti është regjistruar rreth orës 23:00 të 14 Janarit, në lagjen “Ali Demi”, në afërsi të shkollës “Kushtrimi i Lirisë”, (në drejtim të Shkozës). Policia bën me dije se drejtuesi i automjetit që shkaktoi aksidentit, shtetasit R. A., 22 vjeç, banues në Tiranë për veprën penale “Shkelja e rregullave të qarkullimit rrugor”.
Blutë e kryeqytetit bëjnë gjithashtu me dije se gjatë kontrollit të dokumentacionit të automjetit tip “Skoda”, që drejtonte shoferi i arrestuar, nuk janë konstatuar mangësi, si dhe pas kryerjes së testit të alkoolit ka rezultuar se drejtuesi i automjetit, nuk kishte konsumuar alkool.
Njoftimi:
Në lidhje me një lajm të publikuar në portale, i cili bën fjalë për një aksident të ndodhur në lagjen “Ali Demi”, ju informojmë se:
Më datë 15.01.2024, në orën 01:30, është bërë arrestimi i shtetasit R. A., 22 vjeç, banues në Tiranë, për veprën penale “Shkelja e rregullave të qarkullimit rrugor” dhe materialet i kanë kaluar për veprime të mëtejshme procedurale, Prokurorisë pranë Gjykatës së Shkallës së Parë të Juridiksionit të Përgjithshëm Tiranë.
Ky shtetas, më datë 14.01.2024, rreth orës 23:00, në lagjen “Ali Demi”, në afërsi të shkollës “Kushtrimi i Lirisë”, (në drejtim të Shkozës), në vendkalimin e këmbësorëve, ka aksidentuar shtetasen M. F., 36 vjeçe, banuese në Tiranë, e cila si pasojë e aksidentit është dëmtuar dhe është dërguar në spital për ndihmë mjekësore.
Gjatë kontrollit të dokumentacionit të automjetit tip “Skoda”, që drejtonte shtetasi R. A., nuk janë konstatuar mangësi, si dhe pas kryerjes së testit të alkoolit ka rezultuar se drejtuesi i automjetit, nuk kishte konsumuar alkool.
Mbrëmjen e sotme, si pasojë e dëmtimeve të marra nga aksidenti, shtetasja M. F., ka ndërruar jetë.
Policia po vazhdon kryerjen e veprimeve të mëtejshme procedurale.
