Një 37-vjeçare është arrestuar nga policia e Fierit pasi akuzohet se shfrytëzonte për prostitucion një vajzë 24 vjeçe.
Lidhur me rastin janë proceduar penalisht edhe katër persona.
“Nga një hetim disajavor i ndjekur me metoda proaktive nga specialistët e Seksionit për Hetimin e Trafiqeve të Paligjshme të Drejtorisë Vendore të Policisë Fier dhe nga Prokuroria e Fierit, u siguruan prova për një rast të veprimtarisë kriminale të prostitucionit. Në bazë të këtyre provave u finalizua operacioni policor i koduar ‘Gjurmimi’, gjatë të cilit u arrestua në flagrancë shtetasja F.A. (Flurime Avdulaj), 37 vjeçe, banuese në Fier. 37-vjeçarja dyshohet se ka shfrytëzuar për prostitucion, një shtetase 24 vjeçe”, thuhet në njoftimin e bluve.
“Gjithashtu, në kuadër të këtij operacioni, u referuan materialet në Prokurori, ku nisi procedimi në gjendje të lirë për 4 shtetas, të dyshuar të implikuar në këtë veprimtari kriminale. Vijon puna për identifikimin dhe nxjerrjen përpara përgjegjësisë penale, të shtetasve të tjerë të përfshirë në këtë rast”, thuhet më tej në njoftim.
