Përfaqësues të OSBE-së në Tiranë do të takohen këtë të mërkurë me kreun e grupit parlamentar demokrat, Gazment Bardhi. Takimi pritet të zhvillohet në orën 14:00 në ambientet e Kryesisë së Kuvendit.
Ky takim me Gazment Bardhin vjen pas takimeve të ditës së djeshme me dy bashkëkryetarët e komisionit të posaçëm të reformës zgjedhore, Damian Gjiknurin dhe Enkelejd Alibeajn.
Mandati komisionit të posaçëm të reformës zgjedhore përfundon në muajin mars dhe është shndërruar në krye-temë e debatit politik në vend pas nisje të sesionit të ri parlamentar.
Komisioni i Posaçëm i Reformës Zgjedhore pritet të mblidhet ditën e premte, 19 janar, në orën 11:00, pas dakordësisë së arritur mes palëve. OSBE ka kërkuar që diskutimet për reformën zgjedhore të jenë konsesuale dhe gjithëpërfshirë.
Vlen të theksohet fakti se shumica e grupit parlamentar të PD-së i ka kërkuar Kuvendit zëvendësimin e Enkelejd Alibeajt me Oerd Bylykbashin, por kjo kërkesë është rrëzuar nga mazhoranca.
