Kreu i grupti parlamentar të PD-së, Gazment Bardhi ka reaguar pasi Lulzim Basha i quajti “burrec të vegjël” pas tensioneve në Komisionin e Edukimit me Flutura Açkën, duke iu referuar edhe Flamur Nokës.
Në një postim në rrjetet sociale, Bardhi shkruan se ndihet i keqardhur nga debati me kolegë të opozitës, teksa shton më tej se ata duhet të jenë në krah të tyre dhe jo përballë si Edi Rama.
Ai e konsideron si tentativë për të provokuar me “normalitet të rremë” i kolegëve të opozitës, që sipas tij nuk mund të jetë kurrë strategjia e një opozitari. Në lidhje me Bashën, Bardhi shkruan se kjo është “strategjia e një të paburri, që vetë rri në shtëpi e kujdeset të shtojë katet në Kulla, ndërkohë që keqpërdor për fasadë të pazareve në kurriz të demokratëve, ndershmërinë e disa zonjave deputete, që vazhdojnë të besojnë gënjeshtrat e tij”.
Reagimi i plotë:
“Absolutisht i keqardhur nga debati me kolegë të opozitës! Por, është fakt i njohur që opozita është në një betejë kundër mazhorancës në Kuvend, dhe çdo opozitar duhet të jetë krah nesh në këtë betejë, dhe jo përballë njëlloj si Edi Rama. Tentativa për të provokuar me “normalitet të rremë” i kolegëve të opozitës, nuk mund të jetë kurrë strategjia e një opozitari. Ajo është vetëm strategjia e një të paburri, që vetë rri në shtëpi e kujdeset të shtojë katet në Kulla, ndërkohë që keqpërdor për fasadë të pazareve në kurriz të demokratëve, ndershmërinë e disa zonjave deputete, që vazhdojnë të besojnë gënjeshtrat e tij!” – shkruan Bardhi.
