Kukësi nuk arriti të merrte pikë në Shkodër teksa u mposht nga Vllaznia minimalisht duke mbetur në vendin e parafundit të renditjes.
Verilindorët patën shansin e artë të barazonin që në pjesën e parë me një penallti, por sulmuesi Atdhe Rashiti shpërdoroi gjithçka duke dërguar topin mbi traversë.
Pas ndeshjes, zv.trajneri Oltijon Kërnaja dha një prononcim për MCN TV ku shprehu qartë pakënaqësinë me sulmuesin e tij, ndërsa njëkohësisht përgënjeshtroi zërat se trajneri i skuadrës Stavri Nica ka dhënë dorëheqjen pas përfundimit të takimit.
“Provuam me të gjitha mënyrat, ajo që nuk shkoi ishte finalizimi. Morëm një penallti, luajtëm mirë pavarësisht një gabimi në minutën e parë. Ky është futbolli, ndonjëherë nuk fiton më i miri.
Penalltia e Rashitit? Rashiti është i përzgjedhuri, por u çuditëm të gjithë kur e humbi. Ndodh në futboll dhe u ka ndodhur lojtarëve më të mirë në botë.
Patëm 2-3 raste me lojtarin e ri, përforicme te reja bënë mirë. Do të kemi edhe një tjetër në ditët në vijim, jemi në bisedime.
Nica ka dhënë dorëheqjen? Jo nuk është e vërtetë, është thjeshtë i pakënaqur me ndeshjen sot. Nuk e meritonim këtë humbje sot. Është një ndeshje që nuk duhej humbur. Gjatë 90 minutave kontrolluam topin, e kuptoj profesorin që është i mërzitur në këtë pjesë.”
