Agron Haxhimali, ekspert i pushtetit vendor ishte këtë të diel i ftuar në “Review” në Euronews Albania për të folur rreth Censit të popullsisë dhe të dhënave të cilat ende nuk janë bërë publike.
Ai tha se do duhej që këto të dhëna të bëheshin publike në kohë reale, duke iu referuar faktit se të dhënat janë mbledhur përmes teknologjisë. Ai tha më tej se atij nuk i lë shije të mirë as mospublikimi i censusit administrativ.
“Secili nga ne e kërkon shifrën cilësore. Nëse i referohemi kalendarit se kur do të bëhen reale këto shifra unë mendoj se vërtet ka një raport të fundit që do të bëhen në fund të qershorit, por ama mendoj se një investim i paguar nga taksapaguesit shqiptar, me futjen e teknologjisë, e dhëna duhet të kalonte menjëherë në ekranet e institutit.
Kjo së paku për disa të dhëna bazike të cilat nuk krijojnë probleme me përpunimin e të dhënave, qytetarëve shqiptar, grupeve të interesit, por edhe kuriozitetit të madh apo sfidës së madhe që Adriatiku ngre me shqetësim të madh, ne duhet t’ia themi një orë e më parë, ky është realiteti. Mua më shqetëson edhe pse nuk bëhet publike censusi administrativ siç bëhet çdo vit në janar.” – u shpreh Haxhimali.
