Zamir Kalemi, 40 vjeç, i ka shpëtuar një atentati mbrëmjen e së premtes tek rreth-rrotullimi i Selitës në Tiranë.
Rreth orës 22:55, Zamir Kalemi ka qenë duke lëvizur me makinën e tij tip “Smart”, kur nga një mjet tjetër në lëvizje është qëlluar disa herë me armë zjarri.
Dyshohet se nga të shtënat, shënjestra ka humbur kontrollin e mjetit duke përplasur makinën me bordurën anësore të rrugës.
Autorët që lëviznin me një mjet tip “Nissan”, dyshohet se e kanë gjurmuar objektivin dhe kur kanë arritur paralel me të kanë hapur zjarr me kallashnikov. Në vendngjarje janë gjetur 15 gëzhoja.
Sipas policisë, Zamir Kalemi është plagosur me armë zjarri në këmbë, ndërsa është transportuar në spitalin e Traumës për ndihmë mjekësore.
Pas atentatit, u një makinë të djegur në Bërzhitë, që dyshohet se është përdorur nga autorët. Brenda automjetit, u sekuestrua një kallashnikov.
Vrasjet
Një nga pistat e hetimit të atentatit të sotëm është vijimi i konfliktit që në 2022 dyshohet se solli dy vrasje – u ekzekutuan Aleksandër Sadikaj dhe Edmond Papa.
Zamir Kalemi është kushëriri i 27-vjeçarit Aleksandër Sadikaj dhe vëllai i Andrea Kalemit, i cili dyshohet të ketë lidhje me vrasjen e Edmond Papës.
Më 11 qershor 2022, Aleksandër Sadikaj u vra në një shpërthim me telekomandë në Tiranë. Ai po lëvizte me makinë në aksin e njohur si Sauk-TEG. Autorët dyshohet se kishin vënë një sasi të konsiderueshme tritoli të komanduar me telekomandë, në pjesën e përparme të makinës e cila është aktivizuar gjatë lëvizjes.
Gjashtë muaj më pas u vra po në Tiranë biznesmeni nga Saranda Edmond Papa. Për ekzekutimin e tij i arrestuar është shoku i Andrea Kalemit, Albano Velo, ndërsa në kërkim është shoku tjetër Andrew Bode.
Vëllai të plagosurit të kësaj të premteje, Andrea Kalemi dyshohet të jetë i përfshirë në vrasjen e Edmond Papës.
Pas ekzekutimit të Sadikajt, Andrea Kalemi i ka shpëtuar dy atentateve. Njëri më 9 gusht 2023 në Greqi. Andrea Kalemi kishte shkuar me pushime me 3 fëmijët dhe bashkëshorten në ishullin Pax, kur u qëllua me armë zjarri.
Tjetri më 14 dhjetor 2023, kur Andrea Kalemi u plagosur me thikë në burgun “Koridhalos” po në Greqi. Autori, sipas mediave greke, ishte një 28-vjeçar egjiptian.
Lexo edhe:
Atentati në Tiranë, Policia: 15 000 euro për këdo që jep informacion
