Fakte të reja kanë dalë nga dosja hetimore që lidhet me vrasjen e ish-drejtorit të OST në Rrëshen, Saimir Jaku, ngjarje kjo e ndodhur në 9 shtator të vitit 2016.
Tre autorët pjesëmarrës në këtë krim të rëndë, pasi kanë ekzekutuar Jakun me 14 plumba automatiku dhe plagosën mikun e tij, Gjergj Prenga, në ikje e sipër kanë çarë dhe një postobllok të Policisë Rrugore, duke qëlluar me breshëri automatiku në ajër.
Makina e autorëve një Benz katërfenerësh me xhama të zinj, është pikasur nga një polic në qytet, duke i dhënë targën e mjetit AA149DK të gjitha patrullave të policisë. Ky mjet është vjedhur në Kamëz.
Sipas dosjes së siguruar nga “Ora News” makina e autorëve është identifikuar pak minuta pas kryerjes së krimit, nga një patrulla e policisë rrugore e vendosur në postobllok në Rubik, pranë karburant “Start”.
Por teksa kanë parë punonjësit e policisë që kishin zënë rrugën, një nga autorët ka hapur derën e mjetit dhe ka qëlluar me armë zjarri në ajër.
Më pas policët janë larguar dhe automjeti ka vijuar rrugën në drejtim të Milotit dhe në fshatin Skuraj, ka lënë rrugën kryesore dhe është larguar për në drejtim të fshatit Vinjoll të rrethit Kurbin.
Autorët pasi kanë ndaluar automjetin në vendin e quajtur Vinjoll, e kanë djegur atë dhe më pas janë larguar, me mjete të tjera.
Për këtë krim të rëndë policia dhe prokuroria e Lezhës, kanë identifikuar vetëm një nga tre autorët, i cili rezulton të jetë Dorjan Keqi, një i ri nga fshati Vinjoll i Kurbinit, që pretendon se punon si murator.
Identifikimi i tij është bërë në datën 27 korrik 2022, pasi u arrestua krejt rastësisht teksa udhëtonte me makinë së bashku me nipin e Durim Bamit.
“…në sistemin AFIS, ka rezultuar se është identifikuar gjurma papilare e fiksuar në vendin e ngjarjes, vrasje me armë zjarri të Saimir Jakut, të fiksuara në bidonin plastik me lëndë djegëse benzinë, gjetur pranë automjetit të djegur nga autorët e krimit në vendin e quajtur Vinjoll-Kurbin, i përkasin shtetasit Dorjan Ismail Keqi…”-thuhet në dosjen hetimore.
Për momentin Dorjan Keqi është marrë i pandehur dhe dërguar në gjykatë duke u akuzuar për veprën penale të “Vrasja në rrethana të tjera cilësuese” dhe “Mbajtja pa leje dhe prodhimi i armëve, armëve shpërthyese dhe i municionit”.
Në dosjen hetimore thuhet se krimi i rëndë është regjistruar në 9 shtator 2016,pasi Sajmir Jaku ka dalë nga shtëpia në mëngjes dhe rreth orës 09:10 dhe ka shkuar tel lokal “Filopati”, së bashku me kushëririn e tij, Jurgen Jaku.
Pasi janë ulur në një prej tavolinave të verandës së këtij lokali, i ndjeri Saimir Jaku ka ftuar për të pirë kafe edhe shtetasin Ardian Tusha dhe pak më vonë me ta është bashkuar edhe Gjergj Prenga.
Pasi ka qëndruar pak minuta, Ardian Tusha ka dalë nga lokali për të shkuar tek puna e tij pranë Muzeut të qytetit Rrëshen.
Gjatë kësaj kohe në qytetin e Rrëshenit është konstatuar në lëvizje një automjet Mercedez-Benz, 4 fenerësh, me ngjyrë të zezë, me targa AA149DK dhe me xhama te zi.
Ky automjet është ndaluar përpara lokal “Filopati” në rrugën kryesore dhe nga kjo makinë kanë zbritur 2 persona, të armatosur me armë zjarri të llojit automatik, të veshur me rroba të zeza dhe të maskuar, të cilët pasi janë ngjitur në verandën e lokalit, kanë qëlluar në drejtim të Saimir Jakut, të cilin e kanë lënë të vdekur në vend dhe nga të shtënat është plagosur Gjergj Prenga, i cili ka qenë në tavolinë me të ndjerin Saimir Jaku.
Pas kryerjes së krimit autorët kanë dalë jashtë nga lokali dhe kanë hipur në automjetin me targa AA149DK, duke u larguar në drejtim të qytetit të Rubikut.
Nga këqyrja automjetit të lartpërmendur, është konstatuar se ishte i djegur plotësisht. Pranë automjetit është gjetur dhe sekuestruar një bidon plastik 3 litërsh, i boshatisur, në të cilin ndihej era e benzinës.
Pikërisht në këtë bidon është siguruar një gjurmë gishti, ku pas krahasimeve të kryera, ka rezultuar se i përket të arrestuarit Dorian Keqi.
/Ora News
