Prokuroria e Posaçme njofton se ka dërguar për gjykim të mërkurën dosjen në ngarkim të Gazmend Canajt, akuzuar për kryerjen e veprës penale: “Korrupsioni aktiv në zgjedhje”.
“Nga analiza një e nga një dhe në unitet të provave të administruara gjatë hetimit (përgjimet telefonike dhe deklarimet e personave që kanë dijeni për veprën penale) provohet tej dyshimit të arsyeshëm të bazuar në prova se, i pandehuri Gazmend Canaj iu ka ofruar në mënyrë të drejtpërdrejtë personave të ndryshëm përfitime ekonomike që ata të votojnë në një mënyrë të caktuar, në mbështetje të subjektit politik që Gazmendi mbështeste në zgjedhjet e përgjithshme parlamentare në qarkun e Tiranës, të datës 25 prill 2021”, njofton SPAK.
Sipas të njëjtave burime, rezulton e provuar se i pandehuri Gazmend Canaj iu ka ofruar dhe dhënë ushqime shtetasve G. K. dhe E. G. si dhe ju ka ofruar përfitime të paligjshme shtetasve S. K., R. C. dhe F. R., kundrejt votës së tyre dhe të afërmve të tyre, në favor subjektit politik që Gazmendi mbështeste, që sipas burimeve pranë prokurorisë është Partia Socialiste.
Ish-punonjësi i Kadastrës Gazmend Cana u arrestua edhe në vitin 2021 për veprën penale “Ushtrimi i ndikimit te paligjshëm ndaj personave që ushtrojnë funksione publike”. Sipas hetimeve, bashkë me kolegë të tjerë, Cana ka marrë ryshfet dhe ka ndërhyrë për përshpejtimin e procedurave të marrjes së shërbimeve kadastrale dhe pajisjes së tyre me dokumente pronësie.
Për këtë çështje, është dënuar me 2 vite e 4 muaj burgim.
