Kuvendi i ka dërguar një shkresë ditën e sotme Komisionit Qëndror të Zgjedhjeve ku i bën me dije përfundimin e mandatit të ish-zëvëndëskryeministrit Arben Ahmetaj, për shkak se ka 6 muaj që nuk paraqitet në seancat plenare.
Kuvendi thotë se Arben Ahmetaj ka munguar pa arsye që prej 6 Korrikut dhe se e ka detyrim ta njoftojë KQZ-në për këtë vakancë.
“Kuvendi i Shqipërisë, në bazë të shkronjës “d” të gikës 2 të nenit 71 të Kushtetutës së Republikës së Shqipërisë dhe Rregullores së Kuvendit, Ju njofton mbarimin përpara afatit kushtetues të mandatit të deputetit të PS-së Arben Ahmetaj, për shkak të mungesës së tij pa arsye për mbi 6 muaj rresht në Kuvend. Kjo për arsye se seanca e fundit plenare ku deputeti Arben Ahmetaj ka martë pjesë është data 6 korrik 2023. Sa më sipër, në mbështetje të nenit 164, pika 1, të ligjit nr. 10019, datë 29.12.2008 “Kodi Zgjedhor i Republikës së Shqipërisë”. Kuvendi i Shqipërisë ka detyrimin ligjor për të njoftuar Komisionin Qendror të Zgjedhjeve për krijimin e vakancës”, thuhet në shkresën e Kuvendit depozituar në KQZ.
Kujtojmë se seanca plenare e 6 Korrikut ka qenë hera e fundit kur ish-zv.kryeministri Arben Ahmetaj është paraqitur në Kuvend, pasi katër ditë më vonë u shpall në kërkim nga Prokuroria e Posaçme.
SPAK i ka dërguar shkresë Interpol Tiranës për kërkimin e tij jashtë Shqipërisë, teksa akuzohet për përfitime të paligjshme nga dy biznesmenët e Inceneratorëve, Klodian Zoto dhe Mirel Mërtiri. Ndaj tij rëndojnë akuzat për refuzim për deklarim, fshehje ose deklarim i rremë i pasurive, korrupsionit pasiv dhe aktiv i funksionarëve të lartë shtetërorë dhe pastrim të produkteve të veprës penale.
Më vonë, ai u mor i pandehur edhe në lidhje me privatizimin e ish-furrës së bukës, në zonën e “Medresesë”, në Tiranë, ku tashmë ndodhet kompleksi “Emerald”. Një procedurë që sipas prokurorisë është kryer në mënyrë jo ligjore dhe vlerësohet se i ka shkaktuar shtetit një dëm prej 7 mld lekë të vjetra. Lidhur me çështjen vijon hetimi dhe për 7 persona të tjerë, përfaqësues të Ministrisë së Financave dhe ndaj biznesmenit Lirim Fezollari.
Arben Ahmetaj ka reaguar nga arratia përmes postimeve në rrjetet sociale për të dyja çështjet, ku ka mohuar akuzën e ngritur ndaj tij. Por, edhe pse mbi të rëndojnë akuza korrupsioni, Partia Socialiste nuk ka ndërmarrë akte për ta përjashtuar atë nga grupi parlamentar, duke e lënë që ta përfundonte vetë.
Pak kohë më parë, kreu i grupit parlamentar të PS-së, Blendi Çuçi, u ndje në siklet kur u pyet nga gazetarët se çfarë do të bënte PS-ja me mandatin e Arben Ahmetajt sa kohë ajo po tregohej e zellshme për t’i hequr imunitetin një tjetër deputeti, kësaj here nga opozita.
“Nuk e kemi përjashtuar Arben Ahmetaj. Nuk kemi marrë vendim, nuk ka arsye. Çfarë arsye ka ai, ka punë me drejtësinë. Problem është që nuk është prezent. Saimir Tahiri ka qenë prezent”- tha Çuçi në atë kohë.
Referuar afateve kushtetuese, me çeljen e sesionit të ri parlamentar në javën e tretë të muajit Janar 2024, Arben Ahmetajt i ndërpritet mandati i deputetit. Fillimi i sesionit të ri parlamentar shpallet përmes një seancë plenare thirrur nga kryeparlamentarja, Lindita Nikolla. Krahas seancës bëhet edhe verifikimi i mandateve, referuar nenit 71 të Kushtetutës. Ky nen sanksionon në pikën 2 të tij se mandati i deputetit mbaron ose është i pavlefshëm kur mungon pa arsye mbi 6 muaj rresht në Kuvend.
Kështu, kryeministri Edi Rama largon në heshtje nga Kuvendi një bashkëpunëtorët e tij më të ngushtë të akuzuar nga drejtësia për korrupsion, ku sipas kreut të qeverisë, kanë ngrënë dardha pas shpinës së tij.
Në bazë të ligjit, zëvendësimi i Arben Ahmetajt në Kuvend bëhet me një tjetër deputet, bazuar në listën fituese të kandidatëve të PS në zgjedhjet parlamentare të vitit 2021.
Sipas votave preferenciale të kandidatëve në zgjedhjet parlamentare të vitit 2021, mandati i Arben Ahmetajt i kalon Dallëndyshe Bicit, drejtoreshës aktuale të Agjencisë Shtetërore të Kadastrës, e cila arriti të merrte 4977 persona.
Nëse kjo e fundit, nuk e pranon mandatin e deputetit, atëherë i kalon Plarent Ndrecës, i cili në vitin 2021 arriti të merrte 4008 persona. Pas tyre, në listë renditen Eljo Hysko dhe Ervin Bushati.
