Policia e Durrësit ka goditur një rast të shitjes së drogave të forta, në afërsi të shkollave, në lokale dhe ambiente të ndryshme dhe si rezultat ka arrestuar dy vëllezër.
Në kuadër të operacionit policor të koduar “Pjeza” janë vënë në pranga vëllezërit Ndriçim Balla, 45 vjeç, dhe Indritit (Balla) Dauti, 41 vjeç, vëllezër, banues në fshatin Pjezë të Shijakut.
Raportohet se operacioni i uniformave blu brenda banesës së dy vëllezërve Balla është bërë pas informacioneve të siguruara nga inteligjenca policore. Blutë e qytetit bregdetar kanë gjetur brenda banesës 1 kg e 50 gramë lëndë narkotike kokainë dhe dy peshore elektronike që këta shtetas i përdornin për të ndarë lëndën narkotike në doza. Gjithashtu, raportohet se janë sekuestruar edhe 2 automjete dhe 4 celularë.
Materialet procedurale i kaluan Prokurorisë së Durrësit për veprime të mëtejshme, për veprën penale “Prodhimi dhe shitja e narkotikëve”, kryer në bashkëpunim.
Policia ka publikuar me video edhe pamjet e aksionit kur dy vëllezërit Ndriçim Balla dhe Indritit (Balla) Dauti kapen në flagrancë.
