Policia e Vlorës bën me dije se ka nisur procedimin penal në gjendje të lirë për biznesmenin e njohur Vasil Bedinaj, për shkak se në një objekt në ndërtim në zonën e Radhimës, ku ai është investitor, por kryheshin punime jashtë lejes së miratuar nga organet kompetente.
Gjithashtu, blutë e qytetit bregdetar bëjnë me dije se është shpallur në kërkim shtetasi Altin Karalliu me banim në Vlorë, drejtues i punimeve në firmën ndërtuese, që sipas policisë nga 5 kate me leje, u zbulua në terren, se po ndërtohej i gjashti, rreth 700 metra katror.
“Specialistët për Hetimin e Krimeve të Komisariatit të Policisë Vlorë referuan materialet në Prokurori dhe po punojnë për kapjen e shtetasit Altin Karalliu, banues në Vlorë, me detyrë drejtues i punimeve në një firmë, pasi gjatë kontrollit në terren, shërbimet e Policisë në bashkëpunim me IVMT Vlorë kanë konstatuar se në një objekt që po ndërtohej nga kjo firmë, punimet po kryheshin jashtë lejes së miratuar nga organet kompetente. Gjithashtu, për këtë rast, nisi procedimi në gjendje të lirë për shtetasin Vasil Bedinaj, 51 vjeç, investitor në ndërtimin e këtij objekti. Materialet procedurale i kaluan Prokurorisë, për veprime të mëtejshme.” – thuhet në njoftim.
Vasil Bedinaj është pronar i rrjetit të hotelëve “Regina” në Radhimë, si edhe i agjencisë turistike “Regina Travel”. Po ashtu, biznesmeni është edhe kreu i operatorëve turistik në Vlorë.
Në vitin 2016 Vasil Bedinaj i ka shpëtuar një atentati në zonën e Liqenit të Thatë në Tiranë, pasi në mjetin e tij, tip Benz” u gjet një sasi prej 450 gramë lëndë plasëse C-4, e cila nuk kishte shpërthyer për shkak të një defekti teknik tek detonatori. Më herët ai ka kandiduar dhe si kandidat i pavarur në zgjedhjet lokale për Bashkinë e Vlorës, si prurje e shoqërisë civile dhe biznesit.
