Shkëlzen Berisha, djali i ish-kryeministrit Sali Berisha, është paraqitur këtë të mërkurë në seancën gjyqësore në GJKKO, ku është thirrur për herë të parë për të dëshmuar për çështjen e Gërdecit.
Shkëlzen Berisha do të pyetet në lidhje me faksin që ish-ministri i Drejtësisë Aldo Bumçi i ka dërguar Ministrit të Mbrojtjes së kohës Fatmir Mediu me shënimin “për Shkëlzen Berishën”, në pjesën e sipërme të dokumentit në krahun e majtë.
Po ashtu, Shkëlzen Berisha do të pyetet sot edhe për takime me ministrat e kohës në qeverinë Berisha dhe një telefonatë me Fatmir Mediun menjëherë pas shpërthimit në Gërdec, ku humbën jetën 26 persona e mbetën qindra të plagosur.
“Do të flas kur të dal”, është shprehur Berisha teksa hynte në ambientet e GJKKO-së ku do të mbahet seanca e radhës gjyqësore.
Shkëlzen Berisha ishte thirrur që në seancën gjyqësore të 14 Dhjetorit, por atë ditë nuk u parqaqit për shkak se nuk i kishte shkuar njoftimi i SPAK. Në seancën e 14 Dhjetorit dëshmoi Aldo Bumçi, i cili në lidhje me faksin e përmendur më sipër pretendoi se kishte bërë kallëzim pasi ishte e falsifikuar, por nuk ishte në gjendje të jepte shpjegime nëse Prokuroria e kishte konstatuar falsifikimin e kësaj shkrese.
