Kuvendi i Republikës ka reraguar në lidhje me atë çfarë ndodhi ditën e djeshme, ku ra pre e hakerimit, bashkë me kompaninë e telekomunikacionit “One Albania”, si dhe atë të avionëve “Air Albania”
Përgjegjësinë për këtë sulm kibernetik e mori grupi i hakerave “Homeland Justice”, të cilët përmes një mesazh në “Telegram”, u shprehën se “do të paguajnë edhe ata që kanë zënë karriket e Kuvendit.”
Kuvendi konfirmon se nga ky sulm është synuar ndërhyrje në infrastrukturë dhe tentativë për fshirje të të dhënave, por shton më tej se nuk janë prekur të dhënat në sistem. Gjithashtu, thuhet se ekspertët e IT po punojnë për të zbuluar se çfarë pasojash ka sjellë ky sulm në sistemin e Kuvendit të Shqipërisë.
“Gjatë ditës së djeshme është konstatuar një sulm kibernetik ndaj institucionit të Kuvendit të Shqipërisë. Sipas ekspertëve, nga ky sulm është synuar ndërhyrje në infrastrukturë dhe tentativë për fshirje të të dhënave. Ju bëjmë me dije se nuk janë prekur të dhënat në sistem dhe ekspertët janë angazhuar plotësisht, që prej momentit kur kanë detektuar këtë ndërhyrje nga jashtë institucionit. Ekspertët e IT po punojnë për të zbuluar se çfarë pasojash ka sjellë ky sulm në sistemin e Kuvendit të Shqipërisë. Për sa më sipër, dalja LIVE e shërbimeve kërkon kohë pasi po kontrollohen të gjitha detajet dhe vijon puna për të kthyer në normalitet faqen e Kuvendit të Shqipërisë.”
