Një ngjarje e rëndë është regjistruar në Korçë. Një 18-vjeçar nga Durrësi i ka dhënë fund jetës duke u hedhur kati i 8 i një pallati, në zonën e terminalit të qytetit juglindor.
18-vjeçari kishte shkuar në Korçë për të festuar me disa miq të tij dhe kishin marrë me qira një nga hyrjet e pallatit. Pas festimeve të mbrëmjes së djeshme, 18-vjeçari është hedhur nga dritarja dhe ka ndërruar jetë në vend.
Trupi i pajetë është transportuar në morgun e spitalit Korçë, për të kryer veprimet mjeko-ligjore.
Policia ka shoqëruar të gjithë personat që u gjetën në ambientin të cilin e kishin marrë me qera dhe vijon intervistimi i tyre për sqarimin e plotë të rrethanave dhe mekanizmit të ngjarjes së rëndë.
“Më datë 25.12.2023, rreth orës 03:50, në lagjen nr. 17, Korçë, në trotuar, është gjetur i pajetë shtetasi G. M., 18 vjeç, banues në Durrës. Nga hetimet e para dyshohet se ky shtetas nën efektin e pijeve alkoolike, mund të jetë vetëhedhur nga tarraca e një pallati, në të cilin 18-vjeçari së bashku me disa shokë të tjerë kishin marrë me qera ditore, një hyrje apartamenti në katin e tetë (të fundit) të tij.“- njofton policia.
Grupi hetimor, nën drejtimin e Prokurorisë po vijon punën për zbardhjen dhe dokumentimin e plotë ligjor të ngjarjes.
