Egnatia në sfidën e parë mundi Tiranën falë Paulauskasit e Duamenës, duke marrë që prej asaj dite kryesimin. Skuadra e Tiranës, edhe pse ishte në avantazh dy herë, nuk ia doli të merrte pikë.
Në atë sfidë shënuan Lulaj dhe Kaina. Bardheblutë gjithashtu janë mundur në dy ndeshjet e fundit që janë përballur me Egnatian si në kampionat dhe në finalen e Kupës së Shqipërisë.
Skuadrës me shumë mundësi në Rrogozhinë do t’i mungojnë Filip Najdovski dhe Kaina Nunesh. Burime në skuadër bëjnë me dije se dy lojtarët kanë probleme në shpinë dhe as nuk stërviten dot dhe as nuk vrapojnë.
Najdovski la lojën me Vllazninë në fund të pjesës së parë, ndërsa Kaina ka ndier shqetësime pas Vllaznisë. Kapiteni dhe sulmuesi i skuadrës janë dy prej mungesave. Florent Hasani nuk është fare me ekipin, pasi është i dëmtuar dhe është shitur te Rapidi.
Klevi Qefalija po kështu është i dëmtuar. Patrik jashtë, pasi rrezikon të operohet, ndërsa Mustafë Abdullahu do të operohet në ditët në vazhdim. Shto këtu Gentian Selmanin dhe Ardit Hilën e larguar. Janë tetë lojtarë jashtë ekipit të Tiranës.
Me 8 lojtarë jashtë, Julian Ahmataj, veç portierit, ka në dispozicion 12 lojtarë. Në këto kushte Ahmatajt i duhet të improvizojë formacionin, sidomos në sulm. Nga minuta e parë do të luajë Haxhiu. Abazaj do të jetë qendërsulmues dhe Latifi nga e majta.
Në portë dihet që do të jetë Kozi. Në mbrojtje, Doka, Lulaj në vend të Najdovskit, Hoxhallari e Përgjoni. Në mesfushë dihet treshja, Meta, Deliu e Lushkja. Dy rezervat e vetme janë Mici e Jonuzi, përfshirë edhe Tolën apo Kainën, edhe pse është pa stërvitje.
Formacioni i mundshëm i Tiranës: 4-3-3: Kozi; Doka, Lulaj, Hoxhallari, Përgjoni; Meta, Deliu, Lushkja; Haxhiu (Kaina), Abazaj, Latifi
