Dedan Gjoni, ish-shefi i krimeve të Komisariatit nr.6 në Tiranë, rezulton të jetë i zhytur më thellë në lidhjet e tij me botën e krimit, sesa ajo ç’ka dihet nga akuza e deritanishme.
Për të edhe disa persona të tjerë janë lëshuar urdhër-arreste nga Gjykata e Posaçme me kërkesë të SPAK, lidhur me një vrasje të mbetur të tentativë, e planifikuar të realizohej më 17 Shtator 2019, në Durrës.
Hetimet nisën nga SPAK në bazë të informacioneve të përcjella nga autoritetet e drejtësisë së Holandës.
Përgjimet e “SKY” dhe hetimet e mëtejshme, sipas burimeve pranë grupit hetimor, kanë arritur të zbardhin sesi Dedan Gjoni është vënë në shërbim të një grupi kriminal, duke marrë përsipër të nxjerrë në pritë një kundërshtar të tyre – Xhevdet Plaku.
Dedan Gjoni e nxori në pritë
Sipas të njëjtave burime: shënjestra kërkohej të vritej nga një grupi kriminal për arsye që mendohet të kenë të bëjnë me pazaret e drogës. Një tjetër pistë është ajo e hakmarrjes ndaj Plakut, i cili ka qenë i akuzuar për vrasjen e një shqiptari në vitin 2014 në Itali.
Në kushtet kur grupi nuk po arrinte ta lokalizonte, kërkojnë ndihmën e Gjonit, asokohe me detyrë në Drejtorinë e Policisë Durrës. Ky i fundit e shoqëron Plakun me pretendimin për ta marrë në pyetje për një ngjarje. Pas kësaj, dërgon te grupi kriminal fotografi të shënjestrës si edhe i informon për orarin që do ta lërë të lirë pas marrjes në pyetje.
Pavarësisht informatave të marra, grupi kriminal nuk arriti të kryejë vrasjen, që paraprakisht dyshohet të jetë urdhëruar nga Holanda. Motivet janë ende të paqarta.
Dedan Gjoni është në qeli, nën masën e sigurisë arrest me burg për një tjetër procedim penale – atë për të cilën akuzohet Ervin Mata, Erzen Brecani dhe të tjerë persona. Edhe për këtë rast, Dedan Gjoni dyshohet të ketë siguruar kushtet për të kryer një vrasje në bashkëpunim me një grup kriminal.
Të arrestuarit
Përveç Dedan Gjonit, për rastin e fundit, janë lëshuar urdhër-arreste edhe për Rexhep Arapin – i njohur edhe si “Kep Arapi”, nipin e këtij të fundit – Algert Arapi, si dhe Devi Gjermënin. Ndaj të katëve, masat janë ekzekutuar këtë të premte. I fundit u vu në pranga në Limburg, Holandë. Masat e arrestit me burg u kërkuan në GJKKO më 16 Dhjetor, ndërsa gjykata i miratoi katër ditë më pas.
Katër të dyshuarit akuzohen për veprave penale: “Sigurimi i kushteve dhe i mjeteve materiale për të kryer vrasje”, në dëm të shtetasit Plakut, kryer në bashkëpunimin e posaçëm të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”.
Kep Arapi, sipas hetimeve, rezulton të ketë komunikuar në “SKY” me ish-zyrtarin e policisë. Rrexhep Arapi është një emër i njohur në raportimet e kronikës së zezë. Dy vite më parë, ai u arrestua për armëmbajtje pa leje në lokalin e tij. Ngjarja më e bujshme për të cilën është akuzuar është ajo e Marsit 1991, kur iu faturua akuza e vrasjes së një personi në Portin e Durrësit për shkaqe gjakmarrjeje. Por për këtë krim që u akuzua, në 1994 u lirua për mungesë provash.
Shënjestra
Xhevdet Plaku, i nxjerë në pritë nga Gjoni, njihej dhe me nofkën “Akili”. Emri i tij u lakua në mediat ndërkombëtare në fund të vitit 2018, kur u njoftua goditja e një rrjeti që merrej me trafik ndërkombëtar kokaine.
Mes të arrestuarve ishte edhe “Akili”, i cili u cilësua si koka e organizatës të cilën e drejtonte nga Amsterdami. Ai u vu në pranga në Holandë.
