Dedan Gjoni, ish-shefi i krimeve të Komisariatit nr.6 në Tiranë, rezulton të jetë i zhytur më thellë në lidhjet e tij me botën e krimit, sesa ajo ç’ka dihet nga akuza e deritanishme.
Për të edhe dy persona të tjerë janë lëshuar tre urdhër-arreste nga Gjykata e Posaçme me kërkesë të SPAK, lidhur me një vrasje të mbetur të tentativë.
Përgjimet e “SKY” dhe hetimet e mëtejshme, sipas burimeve pranë grupit hetimor, kanë arritur të zbardhin sesi Dedan Gjoni është vënë në shërbim të një grupi kriminal, duke marrë përsipër të nxjerrë në pritë një kundërshtar të tyre.
Sipas të njëjtave burime: shënjestra kërkohej të vritej nga një grupi kriminal për arsye që mendohet të kenë të bëjnë me pazaret e drogës. Në kushtet kur grupi nuk po arrinte ta lokalizonte, kërkojnë ndihmën e gjonit, asokohe me detyrë më Komisariatin e Shijakut. Ky i fundit e shoqëron personin me pretendimin për ta marrë në pyetje për një ngjarje. Pas kësaj, dërgon te grupi kriminal fotografi të shënjestrës si edhe i informon për orarin që do ta lërë të lirë pas marrjes në pyetje.
Pavarësisht informatave të marra, grupi kriminal nuk arriti të kryejë vrasjen, që paraprakisht dyshohet të jetë urdhëruar nga Holanda.
Dedan Gjoni është në qeli, nën masën e sigurisë arrest me burg për një tjetër procedim penale – atë për të cilën akuzohet Ervin Mata, Erzen Brecani dhe të tjerë persona. Edhe për këtë rast, Dedan Gjoni dyshohet të ketë siguruar kushtet për të kryer një vrasje në bashkëpunim me një grup kriminal.
Përveç Dedan Gjonit, për rastin e fundit, janë lëshuar edhe dy urdhër-arreste të tjera. Një prej tyre për Rexhep Arapin – i njohur edhe si “Kep Arapi”, dhe nipin e këtij të fundit. Kep Arapi, sipas hetimeve, rezulton të ketë komunikuar në “SKY” me ish-zyrtarin e policisë. Rrexhep Arapi është një emër i njohur në raportimet e kronikës së zezë. Dy vite më parë, ai u arrestua për armëmbajtje pa leje në lokalin e tij. Ngjarja më e bujshme për të cilën është akuzuar është ajo e Marsit 1991, kur iu faturua akuza e vrasjes së një personi në Portin e Durrësit për shkaqe gjakmarrjeje. Por për këtë krim që u akuzua, në 1994 u lirua për mungesë provash.
Shënjestra
Personi i nxjerë në pritë nga Gjoni ishte Xhevdet Plaku, i njohur me emrin “Akili”. Emri i tij u lakua në mediat ndërkombëtare në fund të vitit 2018, kur u njoftua goditja e një rrjeti që merrej me trafik ndërkombëtar kokaine.
Mes të arrestuarve ishte edhe “Akili”, i cili u cilësua si koka e organizatës të cilën e drejtonte nga Amsterdami.
