Pavarësisht fakteve se gazetarët dhe mediat kanë përfituar lekë nga inceneratorët, për pronarin “de fakto” sipas SPAK të inceneratorëve, Mirel Mërtiri, kjo nuk përbën shkelje.
Gjatë intervistës në Syri Tv, ai u përball me faktin, ku kompania “EM Capital Group” e krijuar në Bullgari ku pronarë rezultojnë Mirel Mërtiri, Klodian Zoto dhe Eva Blushi, bashkëshortja e Ben Blushit ka përfituar 1.3 milionë dollarë pagesa nga inceneratori për shërbime që as Mirel Mërtiri nuk ka një përgjigje se çfarë kanë kryer.
Ai u justifikua me faktin se nuk është etike të përdoren emra mamash dhe prindërish në TV. Mërtiri tha se ajo kompani ka kryer shërbime në rreth 20 kompani veç inceneratorëve, por kjo përgjigje merret me skepticizëm, pasi ai nuk përmendi asnjë kompani ku kanë ofruar shërbimet.
Po ashtu ai mohoi faktin se shoqëria “EM Capital Group” ka blerë aksione të shoqërisë “Lori Caffe”
“Nuk është korrekte që të përdorin emra prindërish dhe mamash në TV. Ku është shkelja ligjore që e bëni kaq të madhe. Shoqëria ime është një kompani e krijuar në Bullgari . Unë nuk e di pagesën por ka shumë shërbime. Nuk është e vërtetë që shoqëria “EM Capital Group” ka blerë aksionet e Lori Caffe. Janë mbi 20 kompani që kam ofruar shërbime, por nuk kam pse jap emra.” – u shpreh Mirel Mërtiri.
Në lidhje me e-mailin ku flitet për kalimin e një pagese tek Carlo Bollino, pronari i Report Tv dhe Shqiptarja.com gjatë fushatës elektorale, Mërtiri u justifikua me faktin se tek e-maili nuk është ai që komunikon por Klodian Zoto.
“A jam unë në cc e këtij e-maile. Jo” – u shpreh shkurtimisht Mërtiri.
