Një 40-vjeçar është plagosur rëndë me armë zjarri këtë të hënë në Shkodër. I lënduari është Aleksandër Curri, 40 vjeç, ndërsa autori u identifikua si Dedë Bici, 59 vjeç, banues në Lezhë.
Krimi ndodhi rreth orës 9:00 në vendin e quajtur “Dollari”, teksa në zonë ka pasur dhe qytetarë të tjerë. Një dëshmitare tha për gazetarët se shënjestra e atentatit mbeti rreth 10 minuta i shtritë në rrugë, derisa iu dha ndihma nga autoritetet. Më pas, 40-vjeçari u dërgua në spitalin rajonal, në gjendje të rëndë.
“U qëllua në bark, gjak shumë”, e përshkroi dëshmitarja skenën e krimit.
E njëjta tha se personi që e qëlloi u largua më pas në këmbë.
Ndërkaq, burime pranë grupit hetimor bënë me dije se qitësi dyshohet se po lëvizte me biçikletë para plagosjes. 
Pas atentatit, ai dyshohet se e ka braktisur biçikletën dhe është larguar në këmbë drejt qendrës së qytetit. Dyshohet se i lënduari është qëlluar katër herë me pistoletë.
Autori i dyshuar Dedë Bici dhe i plagosuri Aleksandër Curi dyshohet se pak minuta para të shtënave janë konfliktuar. Sipas një burimi policor të pakonfirmuar zyrtarisht, një efektiv policie ka ndërhyrë për të ndaluar konfliktin, por ata i janë drejtuar policit duke i thënë se “e zgjidhim vetë konfliktin se kemi një problem lekësh”. Përplasja verbale megjithatë përfundoi në plagosje. 40-vjeçari Aleksandër Curri kohët e fundit punonte me policinë private si “security” dhe nuk njihej si person problematik nga policia.
Policia konfirmoi vetëm se dyshohet se Bici e ka plagosur Currin “për shkak të një borxhi që i kishte ky i fundit”.
