Tirana ka postuar në rrjetet sociale për transferimin e Hasanit te Rapidi i Bukureshtit në Rumani, duke treguar mirënjohje për kontributin dhe punën e sulmuesit 26-vjeçar.
Nga ky transferim klubi i Tiranës ka përfituar 300 mijë euro, ndërsa ka edhe një klauzolë ku do të përfitojë 10% të parave nëse Rapidi vendos të shesë sulmuesin në të ardhmen.
Postimi i klubit të Tiranës:
“Faleminderit Florent Hasani.
KF Tirana njofton transferimin e lojtarit Florent Hasani në klubin rumin të FC Rapid Bucuresti dhe shpreh mirënjohjen për kontributin e lojtarit dhe punën e tij të palodhur.
Faleminderit për emocionet e panumërta sa herë ke tundur rrjetën. Kjo fanellë do të mbetet gjithmonë shtëpi për ty. Suksese në rrugëtimin tënd të ri. Të lumtur që arritëm të nxirrnim në pah cilësitë e lojtarit të madh që je”, shkruhet në postimin e klubit 26 herë kampion.
Kujtojmë se Hasani u shpall dhe golashënues sezonin e kaluar me 16 golat e shënuar te Tirana. Këtë sezon u largua sërish në krye të renditjes së golashënuesve me 10 golat e tij, ndërsa së fundmi fitoi dhe “Këpucën e Artë”.
