Dy aksidente me tre viktima janë shënuar në kryeqytet mëngjesin dhe paraditen e kësaj të hënë.
I pari u shënua në “rrugën e Elbasanit” rreth orës 06:10, kur një automjet përplasi për vdekje një këmbësore. “Automjeti me drejtues shtetasin P. Xh., ka aksidentuar shtetasen A. R., 54 vjeçe, e cila si pasojë e aksidentit ka ndërruar jetë në vendngjarje. Grupi hetimor po punon për sqarimin e rrethanave të aksidentit”, njoftoi policia.
Disa orë më vonë, një tjetër aksident me bilanc edhe më të rëndë është shënuar në afërsi të kryeqytetit. Pranë vendit të quajtur “Shkalla e Tujanit” dy automjete janë përplasur me njëra-tjetrën. Më pas, një nga mjetet ra në humnerë dhe dy personat në bord humbën jetën: Marsel Tefa, rreth 35 vjeç dhe Egila Celami, 29 vjeçe, 29 vjeçe, nga Burreli. Ndërsa drejtuesi i mjetit tjetër, Klaudio Ruçi, ka mbetur i plagosur.
“Në Rrugën e Arbrit, afër Shkallës së Tujanit, janë përplasur 2 automjete. Si pasojë e përplasjes, njëri nga automjetet ka rënë nga lartësia në humnerë dhe 2 shtetasit që kanë qenë në këtë automjet, kanë humbur jetën. Drejtuesi i automjetit tjetër, shtetasi K.R., ndodhet në spital, në kujdesin e mjekëve. Grupi hetimor po punon për sqarimin e rrethanave të aksidentit dhe për identifikimin e 2 shtetasve që kanë humbur jetën”, njoftoi policia.
Viktimat ishin në një automjet tip “Toyota Yaris”, ndërsa i plagosuri në një mjet “Volkswagen Cady”. Dyshohet se përplasja ndodhi për shkak të një parakalimi të gabuar.
“Toyota” është shtypur totalisht dhe është dashur të ndërhynë zjarrfikësit që kanë prerë tavanin e makinës për të nxjerrë trupat e pajetë të dy të rinjve. Ndërkohë, shoferi i Caddyt është transportuar në gjendje të rëndë në spital.
Aksidentet shkaktuan trafik të rënduar.
