Politikani shqiptar Shaip Kamberi ka konfirmuar për Gazetën Express se ka fituar edhe një mandat si deputet në Kuvendin e Serbisë. Shaip Kamberi, udhëheqës i Partisë për Veprim Demokratik, ka fituar edhe një mandat tjetër të përfaqësimit të shqiptarëve të Luginës së Preshevës në Kuvendin e Serbisë.
Siç raportojnë mediat në Preshevë, Kamberi ka arritur votat e mjaftueshme që të bëhet deputet në Parlamentin e Serbisë.
Vetë Kamberi deklaroi më herët se “Jemi shumë afër sigurimit të një mandati, kjo nuk përcaktohet vetëm nga votat që marrim, por nga dalja e përgjithshme”.
Ndërsa, në këto zgjedhje, shqiptarët e Luginës së Preshevës nuk kanë arritur të krijojnë një koalicion të përbashkët.
Kështu shqiptarët kanë garuar me dy lista të ndara: “Beteja politike e shqiptarëve vazhdon-Shaip Kamberi” dhe “Alternativa Demokratike Shqiptare-lugina e bashkuar”.
Të drejtë vote kishin 112 mijë votues nga Kosova, përfshirë shqiptarët e Luginës që jetojnë këtu dhe serbët e Kosovës.
