Policia e Himarë ka arrestuar një 56-vjeçar, pasi akuzohet se ka ndërtuar pa leje në tokë publike, në vijën bregdetare të Dhërmiut. Në pranga është vënë shtetasi Kristo Stramarko, banues në Dhërmi.
“Komisariatit të Policisë Himarë, në bashkëpunim me shërbimet e Stacionit të Policisë Dhërmi, bazuar në informacionet e marra se një shtetas po kryente punime ndërtimi, pa leje, në vijën bregdetare, në fshatin Dhërmi, kanë ushtruar kontroll në zonë. Nga kontrollet u konstatua se shtetasi Kristo Stramarko kishte nisur të ndërtonte një objekt, në tokë publike, në zonë turistike, pa lejen e organeve kompetente.” – thuhet në njoftimin e Policisë.
Materialet procedurale i kaluan Prokurorisë, për veprën penale “Ndërtimi i paligjshëm”.
