Veç kontrolleve fizike, në banesë, zyrë e makinë, SPAK ka përdorur “pajisje speciale gjurmuese operacionale” për të sekuestruar dy aparate celulare të gazetarit Elton Qyno. Fakti bëhet i ditur nga vetë Prokuroria e Posaçme përmes një njoftimi zyrtar, me anë të të cilit konfirmohet edhe versioni i dhënë nga gazetari Qyno për Boldnews.al, lidhur me atë ç’ka ndodhi një ditë më parë.
Prokuroria e Posaçme bën me dije se thirrja e Qynos në SPAK dhe mbajtja e tij me orë të zgjatura erdhi pas konstatimit të disa raportimeve në media të gazetarit lidhur me dosjen hetimore të Nuredin Dumanit. Më konkretisht, komunikime që Nuredin Dumani ka kryer në “SkyECC” me persona të tjerë, që sipas prokurorisë, ishin marrë nga akte hetimore që përbëjnë sekret hetimor. Për këtë ka nisur një procedim penal për veprat “Zbulimi i akteve ose të dhënave sekrete” dhe “Ndalimi i dhënies dhe i shpalljes së të dhënave në kundërshtim me ligjin”.
Elton Qynos iu kërkua të shpjegonte mbi mënyrën se si kishte siguruar akte hetimore, ndërsa gazetari është shprehur se burimi ka qenë konfidencial dhe nuk mundet ta deklarojë për shkak të sekretit që lidhet me profesionin, konfirmon SPAK.
Në këto kushte, prokurori Behar Dibra nxjerr një urdhër që parashikonte kontrollin personal të gazetarit, në banesën e ambientet e tij të punës si dhe mundësia për sekuestro të sendeve personale. Urdhri miratohet nga gjyqtarja e posaçme Atalanta Zeqiri dhe kështu nisin bastisjet e SPAK ndaj gazetarit Elton Qyno.
SPAK thotë se ka përdorur ndaj gazetarit pajisje gjurmuese për të lokalizuar telefonat e tij.
“Në zbatim të vendimeve të gjykatës, kontrolli personal solli rezultat negativ, telefon celular nuk iu gjet; nga kontrolli në banesë dhe në ambientet e punës u gjetën dhe u sekuestruan dokumente dhe sende elektronike tek të cilat dyshohet të ketë gjurmë të veprës penale që po hetohet. Ndërkaq, para mesnatës, me anë të pajisjeve speciale gjurmuese operacionale u bë e mundur që në një Bar Kafe me vendndodhje në distancë të afërt me Godinën e SPAK, të gjenden dy telefona celularë, që pasi iu vunë në dispozicion, të njihen prej tij si sende të tij. Dy telefonat celularë, pajisjet elektronike dhe dokumentacion në letër u sekuestruan në zbatim të vendimit të gjykatës, për t’iu nënshtruar ekzaminimeve të mëtejshme. Në përfundim të veprimeve të urdhëruara nga gjykata dhe të ekzekutuara tashmë, gazetari Elton Qyno u largua nga ambientet e SPAK për në banesë të tij”, thuhet në njoftim.
Vetë Qyno tha dje për Boldnews.al se i kanë sekuestruar gjithë arkivin si gazetar dhe kompjuterin e punës, ndërsa në banesë i morën çdo dokument e pajisje elektronike, madje edhe CD të lojërave që përdornin fëmijët.
Aktet e SPAK janë parë me shqetësim dhe dënuar nga gazetarë, por edhe opozita si veprime që shkelin të drejtat e medias. Vetë Elton Qyno është shprehur se SPAK po i ushtron presion vetëm për shkak se ai bërë detyrën si gazetar.
Një akt të ngjashëm sekuestrosh SPAK dhe GJKKO ndërmori dhe ndaj Lapsi.al, që publikoi listat e patronazhistëve të PS. Vendim që u rrëzua më pas nga Gjykata e të Drejtave të Njeriut në Strasburg.
