“SPAK ka marre peng gazetarin Elton Qyno”. Denoncimi bëhet nga kolegu i tij, Bledian Koka, i cili zbulon se Qyno i cili mbulon sektorin e kronikës, ndodhet prej 10:00 në ambientet e Prokurorisë së Posaçme dhe i kërkohet me ngulm të zbulojë burimet kofidenciale të informacionit.
Në një postim në rrjetet sociale, Koka shkruan:
“Ai (Qyno) mbahet brenda SPAK, me kërkesë të prokurorit Behar Dibra thonë burimet, lidhur me pretendimin për nxjerrje të akteve hetimore. Ndaj tij është bërë presion duke i kërkuar emrin e personit që i ka vënë në dispozicion materialin, në shkelje të të drejtës së gazetarit përcaktuar në Kodin e Procedurës Penale sa i përket ruajtjes së burimit të informacioni.
“Atij i është thënë që nuk mund të lëmë të lirë pa iu treguar emrin, ndërsa i kanë kërkuar edhe aparatin celular”, thonë burime të rezervuara. Ky presion mbi gazetarin vjen pas pas denoncimeve për zyrtarët e arrestuar. P.s…keta nuk jane prokurore te SPAK, por xhelatet e komunizmit qe vazhdojne ‘agjitacion e propagande'”.
Lajmi i mbajtjes në Prokurorinë e Posaçme që prej paradites konfirmohet dhe nga “Ora News”, media pranë së cilës Qyno ushtron profesionin e gazetarit.
“Ora News” shkruan se Qyno ka zbatuar obligim etik të gazetarit që të mos zbulojë burimet e informacionit. E njëjta media raporton se me urdhër të SPAK është ushtruar kontroll në banesën e gazetarit, ku prezent kanë qenë edhe fëmijët e mitur, nërsa një kontroll i ngjashëm pritet edhe në zyrtar e radio-televizionit.
Kolegu tjetër Basir Çollaku shprehet se shkak i mbajtjes së Qynos në ambientet e SPAK lidhet me raportimet e këtij të fundit mbi dëshmitë e Nuredin Dumanit, ndërsa kujton se e njëjta prokurori ka nxjerrë më herët një urdhër të çuditshëm për ndalimin e publikimit nga mediat të materialeve nga kjo dosje hetimore.
Kërkesa e SPAK për të treguar burimet bie ndesh me një nga parimet themelore të gazetarit. Po ashtu, e drejta e gazetarit për të ruajtur burimet parashikohet në legjislacion.
Veprimet e SPAK janë dënuar nga kolegë gazetarë të Elton Qynos. I njëjti qëndrim edhe nga kryetari i PD-së Sali Berisha. “Dënoj me forcën më të madhe këtë akt kriminal, pengmarrje të gazetarit Qyno dhe kërkoj lirimin e tij të menjëhershëm si dhe ndëshkimin e rreptë ligjor të autorëve të këtij akti që përbën një atentat të rëndë ndaj lirisë së mediave dhe rrëmbim shtetëror të gazetarit Elton Qyno”, shkroi Berisha në një postim në FB.
Lexo edhe:
