Një 60 vjeçar është arrestuar nga policia, pasi është kapur në flagrancë teksa tentote të kalonte në kufi lëndë piroteknike dhe mallra të padeklaruara.
Në pranga ka rënë shtetasi me iniciale M. Gj. Gjatë kontrollit në automjetin e tij janë gjetur dhe sekuestruar 131 fishekzjarrë, 4500 kapsollë, veshje dhe mallra të ndryshme, të padeklaruara.
“Shërbimet e Policisë Kufitare në Qafë Morinë, Tropojë, në vijim të kontrolleve për goditjen e paligjshmërive në kufi, bazuar në analizën e riskut dhe në kontrollet me përzgjedhje, në hyrje të RSh-së, kanë kaluar në vijën e dytë, për kontroll më të imtësishëm, automjetin tip “Touran”, me drejtues shtetasin M. Gj.
Gjatë kontrollit të ushtruar në automjetin e këtij shtetasi, shërbimet e Policisë gjetën dhe sekuestruan 131 fishekzjarrë, 4500 kapsollë, veshje dhe mallra të ndryshme, të padeklaruara.
Në përfundim të veprimeve hetimore, specialistët për Hetimin e Krimeve të DVKM Kukës arrestuan në flagrancë, shtetasin M. Gj., 60 vjeç, banues në Fushë Arrëz”,- njofton Policia.
Materialet procedurale iu referuan Prokurorisë, për veprime të mëtejshme.
