Kryetari i PD, Sali Berisha mori pjesë sot në aktivitetin përkujtimor të Partisë Demokratike me rastin e 33-vjetorit të Lëvizjes studentore të Dhjetorit ’90, një përkujtim i cili bëhet çdo 8 dhjetor si ‘Dita e Rinisë’. Aktiviteti në selinë e PD këtë vit u titullua “Dhjetori i historisë dhe librave”.
Berisha tha gjatë fjalës së tij se, në histori nuk ka një datë të dytë tjetër, e cila solli për shqiptarët një epokë që ata nuk e kishin përjetuar kurrë më parë. Berisha shtoi më tej se, Edi Rama zhbëri një nga një arritjet e 8 dhjetorit. Rilindja që ai krijoi, u shpreh, ishte hakmarrje ndaj demokracisë në emër të etërve të tij.
Berisha tha se, ky 8 dhjetor është një kushtrim për çdo shqiptar që të ngrihemi dhe të përmbysim diktaturën e re.
Duke iu referuar kongresit të PS që mbahet po këtë të premte, Berisha tha se “Edi Rama mblidhet sot se mendon se na impresionon, mblidhet me 8 dhjetor, mblidhet në mendësinë e të atit të tij dhe dajës së tij xhelat”.
Kryetari i PD ftoi rininë shqiptare të ngrihet në mosbindje civile deri në përmbysjen e këtij regjimi.
Ai shtoi se “Partia Demokratike do mund ta fitojë këtë betejë dhe do e fitojë, me një kusht të vetëm angazhimin, mobilizimin e të rinjve shqiptarë, e atyre që kanë mbetur këtu, që i kanë rezistuar gjenocidit të Edi Ramës”.
