Ndeshja mes Egnatias dhe Vllaznisë ishte e veçantë për Alen Sherrin, kjo sepse ai si shkodran që është, është një produkt i akademisë së Vllaznisë.
Në këtë ndeshje të luajtur të shtunën e kaluar, rrogozhinasit fituan bindshëm me rezultatin 3-0 që në pjesën e parë.
Për gardianin e Egnatias nuk pati shumë gëzim për këtë fitore. Sherrit i vjen keq për gjendjen ku Vllaznia ndodhet në këtë moment, por beson se në janar do të bëjë ndryshime që do të përmbysë situatën në kampin kuqeblu.
“E pashë shumë të dobët Vllazninë ndaj Egnatias. Nuk e shijova shumë fitoren, duke qenë se po luaja kundër ish-ekipit tim. Më vjen shumë keq për gjendjen e Vllaznisë.
Loja e saj ndaj nesh la për të dëshiruar, por ua them me bindje se nuk ndihem mirë për këtë gjë. Gjithsesi, mendoj se Vllaznia do të jetë në Final Four me ndryshimet që do të bëhen në janar.
Me Egnatian po bëjmë një ecuri pozitive. Shpresojmë të vijojmë me këtë mënyrë. Rivalët kryesorë? Unë shikoj Tiranën dhe Partizanin. Skema e re është e ngatërrueshme disi, por edhe në këtë mënyrë do vijojmë të bëjmë mirë besoj.
E ardhmja? Kam patur dy oferta për të luajtur jashtë, por do të qëndroj edhe një vit tek Egnatia. Ky vit mund të jetë i fundit me Egnatian”, tha Alen Sherri në një intervistë së fundmi.
