Prefekti i Qarkut Kukës, Granit Gjana është pezulluar nga detyra. Masa vjen në kuadër të nje hetimi nga SPAK lidhur me një procedurë tenderuese gjatë kohës që Gjana mbante detyrën e nënkryetarit të bashkisë.
GJKKO, me kërkesë të prokurorisë, ka vendosur ndaj tij masën e sigurimit personal “Pezullimi i ushtrimit të një detyre a shërbimi publik” si i dyshuar për kryerjen e veprës penale të “Shkelja e barazisë së pjesëmarrësve në tendera apo ankande publike”.
Masa është ekzekutuar nga Hetuesit e Byrosë Kombëtare të Kombëtare të Hetimit, ditën e djeshme.
“Nga provat e grumbulluara deri në këtë fazë të hetimit është krijuar dyshimi i arsyeshëm se shtetasi nën hetim G.Gj., në cilësinë e zv/kryetarit të Bashkisë Kukës, por me kompetencat e deleguara si titullar i Autoritetit Kontraktor Bashkia Kukës, ka konsumuar elementë të veprës penale ‘Shkelja e barazisë së pjesëmarrësve në tendera apo ankande publike’, parashikuar nga neni 258/2 i K.Penal”, njofton SPAK.
“Ky shtetas me mosveprimet e tij, e konkretisht mospaisjen në kohën e duhur me Autorizimin për tregtimin e lëndëve djegëse, edhe pse subjekti ‘U.C’ shpk, i kishte kryer pagesat e nevojshme dhe dorëzuar dokumentacionin pranë organit shtetëror sipas ligjit, e ka penguar OE-në të kualifikohet në dy procedurat e tenderit me objekt ‘Blerje karburanti’, në vlerën 21.000.0000 lekë, të organizuara nga Autoriteti Kontraktor Bashkia Kukës përgjatë vitit 2023. Për pasojë shtetasi nën hetim G.Gj. ka dëmtuar interesat e ligjshëm të personit juridik ‘U. C.’ Shpk, duke e penguar këtë subjekt për t’u kualifikuar në procedurën e prokurimit të mësipërm”, shtojnë të njëjtat burime.
Tenderi
Në procedurën tenderuese kanë marrë pjesë dy kompani: Kastrati dhe Ufo Cengu. Firma e dytë është s’kualifikuar, ndërsa fitues i tenderit me objekt “Blerje karburanti” është shpallur “Kastrati”.
Procedura është ankimuar nga “Ufo Cengu” në Komisionin e Prokurimit Publik, që pas shqyrtimit ka vendosur ti japë të drejtë ankimuesit dhe të pezullojë tenderin.
Referuar njoftimit të ankimit nga Agjencia e Prokurimit Publik, arsyeja e s’kualifikimit të “Ufo Cengu” është mosdisponimi i “autorizimit për tregtim te lendeve djegëse(gazoil) me pakicë, pasi ky dokument ka kaluar afatin e skadencës dhe nuk është i rinovuar afati”.
Por, për Komisionin e Prokurimit Publik dhe prokurorinë, s’kualifikimi është në shkelje të ligjit.
